Tags-Gham

kaun dil hai ki tire dard meñ bīmār nahīñ
kaun jī hai ki tire ġham meñ giraftār nahīñ

thā jī meñ us se miliye to kyā kyā na kahiye 'mīr'
par kuchh kahā gayā na ġham-e-dil hayā se aaj

terī yaad ne uTh kar mujh se kal ye pūchhā thā
apne ġham ke sahrā meñ jā sakoge tan-tanhā

ġham-e-hayāt bajā hai magar ġham-e-jānāñ
ġham-e-hayāt se baḌh kar nahīñ to kuchh bhī nahīñ

haqīqat-e-ġham-e-daurāñ ke saath ai nāseh
fareb-e-shīsha-o-sāġhar nahīñ to kuchh bhī nahīñ

nahīñ ġham na mil sakegī mujhe shaiḳh terī jannat
mujhe aarzū nahīñ hai na maiñ haath mal rahā huuñ

mujhe jāda-e-talab meñ rah-e-pur-ḳhatar kā kyā ġham
ki qadam jidhar uThe haiñ usī samt chal rahā huuñ

apnī barbādiyoñ kā mujhe ġham nahīñ
ġham ye hai kis tarah tujh se dekhā gayā

haañ ai ġham-e-ishq mujh ko pahchān
dil ban ke dhaḌak rahā huuñ kab se

har nafas ik mustaqil fariyād hai
kitnī pur-ġham ishq kī rūdād hai

tūl-e-ġham-e-hayāt se ghabrā na ai 'jigar'
aisī bhī koī shaam hai jis kī sahar na ho

kabhī nākāmiyoñ kā apnī ham mātam nahīñ karte
muqaddar meñ jo ġham likkhe haiñ un kā ġham nahīñ karte

ise tahzīb-e-ġham kā naam ahl-e-dard dete haiñ
mire aañsū kabhī dāman tumhārā nam nahīñ karte

daaġh dil chamkā to ġham paidā huā
ye añdherā sub.h-dam paidā huā

un ke aane kī ḳhushī kyā chiiz thī
is ḳhushī se aur ġham paidā huā

marg kā kuchh bhī na thā ai 'josh' ġham
un ke va.ade se ye ġham paidā huā

ḳhazāne bhī mileñ is ke evaz to ham na becheñge
hamārā ġham hai mazlūmoñ kā ġham ye ġham na becheñge

sunā bhī kabhī mājrā dard-o-ġham kā kisī dil-jale kī zabānī kaho to
nikal aa.eñ aañsū kaleja pakaḌ lo karūñ arz apnī kahānī kaho to

jo dil par bojh hai yārab zarā bhī kam nahīñ hotā
zamāna ġham to detā hai sharīk-e-ġham nahīñ hotā

sham.a kī tarah koī ġham-gusār kyā hogā
saath saath chaltī hai raat raat bhar ḳhāmosh