Tags-Gham

shahr-e-dil pe chhā.e haiñ dasht-e-ġham ke sannāTe
kitnī ārzūeñ haiñ sab kī sab magar ḳhāmosh

sail-e-ḳhūñ paikar-e-ash.ār meñ Dhaltā hī nahīñ
ġham vo laavā hai jo siine se ubaltā hī nahīñ

do hī qadam chalī thī paḌe chhāle paañv meñ
ġham se hai chuur zauq-e-safar tum ko is se kyā

vus.at-e-dāmān-e-dil ko ġham tumhārā mil gayā
zindagī ko zindagī bhar kā sahārā mil gayā

ham ne apne qāfile meñ us ko shāmil kar liyā
jo thakā-hārā milā jo ġham kā maarā mil gayā

maiñ tire Dar se ro nahīñ saktā
gard-e-ġham dil se dho nahīñ saktā

hazār ġham sahī dil meñ magar ḳhushī ye hai
hamāre hoñToñ pe māñgī huī hañsī to nahīñ

ġham-e-habīb kahāñ aur kahāñ ġham-e-jānāñ
musāhibat hai yaqīnan barābarī to nahīñ

vo jo ḳhush ḳhush dikhā.ī dene lagā
mere ġham kā javāb lagtā hai

ġham ke mujrim ḳhushī ke mujrim haiñ
log ab zindagī ke mujrim haiñ

maiñ ye to nahīñ kahtā ki bashar dāva-e-ḳhudā.ī kar baiThe
phir bhī ġham-e-ishq se insāñ meñ kuchh shān-e-ḳhudā aa jaatī hai

hamāre dil kā na dar khaTkhaTā pareshānī
hazār ġham haiñ yahāñ lauT jā pareshānī

mujhe rahīn-e-ġham-e-jāñ-navāz rahne de
davā-e-dard-e-jigar chārasāz rahne de

fasāna-e-ġham-e-hastī sunā.e jā hamdam
darāz hai jo ye qissa darāz rahne de

ab baḌh nahīñ saktā ġham-e-duniyā ye ḳhushī hai
zaḳhmoñ kī jagah tak nahīñ baaqī hai jigar meñ

ġham-e-hayāt ne baḳhshe haiñ saare sannāTe
kabhī hamāre bhī pahlū meñ dil dhaḌaktā thā

zabāñ khulī hai to dil phaT paḌā hai sūrat-e-gul
vagarna ham bhī the ġham aap meñ kalī kī tarah

ġham-e-zamāna se dil-tañg the bahut 'bāqar'
simaT ke rah ga.e ehsās-e-bekasī kī tarah

yuuñ to bahut haiñ rāhateñ
ġham kī mire davā nahīñ

ye maanā sach hai koī ġham sadā nahīñ rahtā
ḳhushī milī thī to vo bhī gurez-pā niklī