Tags-Gham

muddatoñ kashmakash-e-yās-o-tamannā meñ rahe
ġham ne jiine na diyā shauq ne marne na diyā

tarbiyat ḳhalq kī karte the baḌī koshish se
us ke har haal meñ ġham-ḳhvār gurū-nānak the

ishq kā maidān āsāñ to nahīñ hai mohtaram
ishq karnā hī agar hai ġham-shi.ārī siikh lo

adū to kyā ye falak bhī use satā na sakā
ḳhushī hañsā na sakī ġham jise rulā na sakā

na pūchh us kī dil-afsurdagī kī kaifiyyat
jo ġham-nasīb ḳhushī meñ bhī muskurā na sakā

kis qadar TuuT ke barse haiñ ye bādal ġham ke
āsmāñ chīḳh uThā hai tire jaane ke baad

dil ḳhuuñ hai ġham se aur jigar yak-na-shud do-shud
lab ḳhushk haiñ to chashm hai tar yak-na-shud do-shud

dard-o-ġham Dālte rahte haiñ mire dil pe kamand
yādeñ bhī lipTī haiñ bargad kī jatāoñ kī tarah

na harīf-e-jāñ na sharīk-e-ġham shab-e-intizār koī to ho
kise bazm-e-shauq meñ laa.eñ ham dil-e-be-qarār koī to ho

ye sukūn-e-jāñ kī ghaḌī Dhale to charāġh-e-dil hī na bujh chale
vo balā se ho ġham-e-ishq yā ġham-e-rozgār koī to ho

surḳh lafz haiñ mere maiñ bhī sher kahtā huuñ aur jab sunātā huuñ
koī bol uThtā hai sher sher meñ tere ek ġham-gusārī hai

ghar se nikal ke shahr ke raste ko ghūrnā
phir ġham-zada sī nazm ke misre ko ghūrnā

ek apnī hī nahīñ haiñ uljhaneñ
kitne ġham-hā-e-digar rakhtā hai vo

qafas meñ aaj tamāshā-e-ġham hai qābil-e-dīd
taḌap rahā huuñ maiñ sayyād kī ḳhushī ke liye

ġham hai yā ḳhushī hai tū
merī zindagī hai tū

ham-nashīñ un ke taraf-dār bane baiThe haiñ
mere ġham-ḳhvār dil-āzār bane baiThe haiñ

ġham hai na ab ḳhushī hai na ummīd hai na yaas
sab se najāt paa.e zamāne guzar ga.e

tumhārī yaad meñ ham jashn-e-ġham manā.eñ bhī
kisī tarah se magar tum ko yaad aa.eñ bhī

hujūm-e-ġham se milī hai hayāt-e-nau mujh ko
hujūm-e-dard se paayā hai hausla maiñ ne

ham ko likhnī thī ik ġhazal lekin
apne ġham kā hisāb likh baiThe