Tags-Gham

muqaddar ko badal deñ vo zamāne ko ḳhafā kar deñ
magar apne tasavvur ko mirā ġham-ḳhvār rahne deñ

vo kyuuñ mujh ko tasallī deñ vo kyuuñ pochheñ mire aañsū
ghirā hai abr-e-ġham āñkhoñ ko gauhar-bār rahne deñ

ubhreñge ek baar abhī dil ke valvale
go dab ga.e haiñ bār-e-ġham-e-zindagī se ham

jo thā sadā se mirā ġham-gusār aaj bhī hai
juḌā usī se mire dil kā taar aaj bhī hai

visāl-e-yār kī ḳhushiyāñ thī chand lamhoñ kī
ġham-e-habīb se dil be-qarār aaj bhī hai

ḳhushī usī kī hamesha nazar meñ rahtī thī
aur apnī quvvat-e-ġham bhī bahāl rakhte the

dekh qāsid ko mire yaar ne pūchhā 'tābāñ'
kyā mire hijr meñ jiitā hai vo ġhamnāk hanūz

vo baar baar mohabbat se zikr-e-ḳhair kareñ
shahīd-e-ġham kī yahī fātiha yahī hai darūd

tarīq-e-ishq meñ kyuuñ bār-e-ġham uThā.e na dil
isī pahāḌ ke nīche hai manzil-e-maqsūd

tirā qalaq bhī tirā dard bhī tirā ġham bhī
hamāre ishq ke itne gavāh haiñ maujūd

janāb-e-'nūh' ko tūfān-e-ġham se ḳhauf nahīñ
ki iḳhtiyār meñ un ke hai kashtī-e-maqsūd

ab ġham kā koī ġham na ḳhushī kī ḳhushī mujhe
āḳhir ko raas aa hī ga.ī zindagī mujhe

gardish-e-rañg-e-tarab se Dar hai
ġham-e-mahrūmi-e-jāved nahīñ

ye māh-pāre to dil ko lubhā.e jaate haiñ
jo ġham ke maare haiñ dil ko gañvā.e jaate haiñ

shab-e-firāq ye ākāsh se ḳhabar aa.ī
ki ġham-nasīboñ se taare ginā.e jaate haiñ

jahān-e-kohna ho yā nau ye vo jahāñ hai jahāñ
tamāshe ġham ke hamesha dikhā.e jaate haiñ

shām-e-ġham kī sahar na ho jaa.e
har ḳhushī muḳhtasar na ho jaa.e

mujh pe itnā karam na farmāo
merā ġham mo'tabar na ho jaa.e

sho.aloñ meñ nikharte haiñ jauhar qismat pe 'farīdī' tanz na kar
ġham aisī hī ne.amat hai jis ko paate haiñ yahāñ qismat ke dhanī

phir ye vahī ġham-e-firāq phir hai vahī kisī kī yaad
uf ye siyāh-baḳhtoñ ruḳhsat-e-shab ke ba.ad bhī