Tags-Gham

kis tavaqqo.a pe sharīk-e-ġham-e-yārāñ hoñge
yaad ham kis ko bhalā ai dil-e-nādāñ hoñge

yaad ik ġham hai ki fariyād fusūñ hai ki junūñ
dard ke rishte haiñ mushkil se numāyāñ hoñge

mujh parda-e-dil pe saaz kar ġham
ho naala merā sitār aayā

shabnam nahīñ har sahar ai 'dā.ūd'
tujh ġham suuñ gul-e-ashk-bār aayā

hote nashāt-e-ishq se bhī faizyāb 'arsh'
majbūr haiñ magar dil-e-ġham-āshnā se ham

basā ke dil meñ tire ġham tire sitam ai dost
jahāñ jahāñ se bhī guzrā maiñ naġhma-ḳhvāñ guzrā

barsoñ ġham-e-gesū meñ giraftār to rakkhā
ab kahte ho kyā tum ne mujhe maar to rakkhā

vo zab.h kare yā na kare ġham nahīñ is kā
sar ham ne tah-e-ḳhanjar-e-ḳhūñ-ḳhvār to rakkhā

ġham haiñ rāh-e-junūñ meñ ahl-e-junūñ
haiñ magar kuchh ḳhabar nahīñ aatī

maiñ junūn-e-ishq aur sahrā-e-ġham
tū adū kī bazm begāne kā ghar

qismat-e-'tarzī' yahī jāgīr thī
shahr-e-ġham kahiye ki vīrāne kā ghar

jo shahīd-e-rāh-e-vafā hue vo isī ḳhushī meñ magan rahe
ki jo din the un kī hayāt ke ġham-e-zindagī meñ guzar ga.e

koī sūrat nahīñ hai zindagī se bach nikalne kī
ġham-o-ālām ke māroñ ko bhī marne nahīñ detī

dukh udāsī malāl ġham ke sivā
aur bhī hai koī makān meñ kyā

bīmār-e-ġham ke vāste kyā maut ke sivā
koī ilaaj dahr meñ ai chāra-gar na thā

yaaro hudūd-e-ġham se guzarne lagā huuñ maiñ
mujh ko sameT lo ki bikharne lagā huuñ maiñ

pilā jām-e-sharāb-e-aish vo sāqī-e-bazm-ārā
ġhubār-e-ġham kuuñ lauh-e-dil suuñ ho jaave to kyā hove

tirī bevafā.ī ke baad bhī mire dil kā pyaar nahīñ gayā
shab-e-intizār guzar ga.ī ġham-e-intizār nahīñ gayā

mujhe us ke zarf kī kyā ḳhabar kahīñ aur jā ke hañse agar
mire hāl-e-dil pe to ro.e bin koī ġham-gusār nahīñ gayā

mirī zindagī mirī shā.irī kisī ġham kī den hai 'jāfarī'
dil o jaañ kā qarz chukā diyā maiñ gunāhgār nahīñ gayā