Tags-Gham

roz-e-mayyat bhī nahīñ kam iid se
pahle rehlat se huā har ġham vidā.a

na jaane sīna-e-ehsās par ye haat hai kis kā
tabī.at be-niyāz-e-shādī-o-ġham hotī jaatī hai

ġham kī har ek baat ko ab ġham pe chhoḌ de
is tishnagī ko qatra-e-shabnam pe chhoḌ de

mausam pe munhasir hai ye fasl-e-ġham-e-hayāt
fasl-e-ġham-e-hayāt ko mausam pe chhoḌ de

tū apne ghar ko talḳhī-e-ġham se bachā ke rakh
aalam kī baat vālī-e-ālam pe chhoḌ de

iisā kabhī na jaate lekin tumhāre ġham meñ
vo bhī to mar rahe haiñ jo āsmān par haiñ

ajal kī duā har ghaḌī māñgte haiñ
ġham-o-dard-o-rañj-o-ta.ab chāhte haiñ

ġham-e-ishq meñ 'dāġh' majbūr ho kar
kabhī jo na chāhā vo ab chāhte haiñ

ġham hai āvāra akele meñ bhaTak jaatā hai
jis jagah rahiye vahāñ milte-milāte rahiye

na samjhā 'dard' ham ne bhed yaañ kī shādī o ġham kā
sahar ḳhandāñ hai kyuuñ rotī hai kis ko yaad kar shabnam

dil kī kaayā ġham ne vo palTī ki tujh sā ban gayā
dard meñ dil Duub kar qatre se dariyā ban gayā

lo mubārak lazzat-e-ġham bhī hai ab to nāgavār
dil mohabbat meñ jo banñā chāhiye thā ban gayā

ġham rag-o-pai meñ utartā hai lahū kī sūrat
dard palkoñ pe laraztā huā ik aañsū hai

kab farāġhat thī ġham-e-sub.h-o-masā se mujh ko
roz o shab kaam rahā āh-o-bukā se mujh ko

zindagī kar ga.ī tūfāñ ke havāle mujh ko
ai ajal kashmakash-e-ġham se chhuḌā le mujh ko

shiddat-e-dard do-pal ke liye kam hotā ki
ġham ke alfāz ke siñgār meñ iz.hār to ho

ātish-e-ġham kī tamāzat ke nisār
jitnā taptā huuñ nikhartā huuñ maiñ

tāza-dam hone ko udāsī
le kar ġham kā shower niklī

jo ba-īñ ġham bhī shādmāñ guzrī
jaane vo zindagī kahāñ guzrī

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ