Tags-Gham

ye aur baat ki dil ġham meñ ḳhud kafīl huā
magar vo aañkh mire ġham meñ ashk-bār rahī

ġham vo kāñTā ki āḳhirī dam tak
dil ko chhoḌā na jaan se niklā

likhtā hai ġham kī baat masarrat ke mood meñ
maḳhsūs hai ye tarz faqat 'kaif' hī ke saath

kam-baḳht kabhī na ḳhush huā tū
ai ġham tirī har tarah ḳhushī kī

hameñ banā.e jo shā.ir nahīñ banā vo ġham
hamāre sher to nārāzgī se nikle haiñ

vahī ġham se aarī haiñ kār-e-jahāñ meñ
jinheñ ḳhuub aatā hai rāheñ badalnā

ġham zamāne meñ koī jins to 'siddīq' nahīñ
kyā ḳharīdeñge koī chiiz ḳharīdār mirī

jab se muā hai kohkan karte haiñ us kā ġham sadā
koh se koh jū se jū sañg se sañg sil se sil

kyuuñ huuñ maiñ aur mire ġham kā use ehsās kahāñ
hai mulāqāt faqat anjuman-ārā.ī tak

tere abrū kī yaad meñ ham ne
nāḳhun-e-ġham se dil-figārī kī

ab ke baras barsāt meñ bhaa.ī
dukh barseñge ġham barseñge

yahī kahtā hai sun sun kar vo ahl-e-ġham ke nāloñ ko
faqīroñ kī sadā.eñ bhī qayāmat haiñ qayāmat haiñ

ġham-e-āshiqī meñ girah-kushā na ḳhirad huī na junūñ huā
vo sitam sahe ki hameñ rahā na pa.e-ḳhirad na sar-e-junūñ

be-dilī se hañsne ko ḳhush-dilī na samjhā jaa.e
ġham se jalte chehroñ ko raushnī na samjhā jaa.e

ek ġhamnāk sī aatī hai sadā
koī dil TuuT rahā hai shāyad

sukh ke mausam uñgliyoñ par gin liye
fasl-e-ġham kā goshvāra aur hai

shirk hai shirk ye ai vā.iz-e-āshufta-ḳhayāl
ġham-e-uqbā ko sharīk-e-ġham-e-duniyā bhī na kar

kis jagah jaa.eñ kis se baat kareñ
apnā koī bhī ġham-gusār nahīñ

boī kabāb soḳhta aa.ī dimāġh meñ
shāyad jigar bhī ātish-e-ġham ne jilā diyā