Tags-Gham

ġham kā guzar hai gaah gahe ḳhurmī kā daḳhl
aate haiñ roz ghar mire mehmāñ na.e na.e

kisī bahāne bhī dil se alam nahīñ jaatā
ḳhushī to jaane ko aatī hai ġham nahīñ jaatā

vo bhalā kaise batā.e ki ġham-e-hijr hai kyā
jis ko āġhosh-e-mohabbat kabhī hāsil na huā

jo tere ġham meñ jale haiñ vo phir bujhe hī nahīñ
jab in kī raakh kuredo sharāre zinda haiñ

mere uljhe hue hālāt ġhanīmat haiñ mujhe
dil kī bātoñ meñ na aa pursish-e-ġham rahne de

zindagī ġham se sañvartī hai nikhartī hai qamar
zindagī ko yūñhī ālūda-e-ġham rahne de

vo bevafā hai to is kā bhī ġham bahut hai magar
maiñ bā-vafā huuñ to is kā bhī hai malāl mujhe

is ḳharābe meñ abas haiñ ġham-o-shādī donoñ
merī taskīn kā maskan hai makāñ se aage

ātish-e-ġham meñ jal rahe haiñ dayār
gard-ālūd hai ruḳh-e-daurāñ

paire koī ḳhaak bahr-e-ġham meñ
āḳhir Duubā maiñ Dhab-Dhabā kar

gard-e-ġham ne zamīñ jhakā.ī
chhoḌā mujhe ḳhaak meñ milā kar

kahāñ tak mujh se hamdardī kahāñ tak merī ġham-ḳhvārī
hazāroñ ġham haiñ anjāne sitāro tum to so jaao

guzar jā.egī ġham kī raat ummīdo to jaag uTTho
sambhal jā.eñge dīvāne sitāro tum to so jaao

use 'qābil' kī chashm-e-nam se derīna ta.alluq hai
shab-e-ġham tum ko kyā jaane sitāro tum to so jaao

nahīñ gila jo mujhe mil gayā hai ġham itnā
kabhī kisī ne to āḳhir ye dard sahnā thā

phir dukhne lage shāne bār-e-ġham-e-hastī se
phir shāne pe zulfoñ ke lahrāne kī bāteñ hoñ

alfāz se khīñcheñ ham tasvīr-e-lab-e-shīrīñ
zahr-e-ġham duniyā ko pī jaane kī bāteñ hoñ

ġham-o-alam bhī haiñ tum se ḳhushī bhī tum se hai
navā-e-soz meñ tum ho sadā-e-sāz meñ tum

zindagī maut ban ga.ī hotī jaan se ham guzar ga.e hote
itne ishrat-zada haiñ ham ki agar ġham na hotā to mar ga.e hote

jab pūrab meñ niil ambar par ik kafūrī phuul khilā
raat guzarne ke ġham meñ tāroñ ne hiirā chaaT liyā