Tags-Gham

kuchh ġham nahīñ but samjheñ bad-o-nek jo chāheñ
allāh ke bande haiñ bure haiñ ki bhale ham

na.ī bārish kī rim-jhim meñ libās-e-ġham to badlegā
vahī rasm-e-chaman hogī magar mausam to badlegā

aur kuchh der ġham nazar meñ rakh
kyā ḳhabar mil hī jaa.e thaah kahīñ

kis qadar aañsū bahā.e tum ne shām-e-ġham 'qamar'
itne taare to falak se bhī kabhī TuuTe na the

jab jhuTpuTā hogā shām-e-ġham kā
palkoñ pe diye jalā.eñge ham

lashkar-e-ġham kī chaḌhā.ī hai ḳhabar-dār ai dil
morcha TūTne paa.ī na shakebā.ī kā

barq girya hai shab-o-roz butoñ ke ġham meñ
'bahr' terā hai janam mardum-e-dariyā.ī kā

vo kuchh aise Dhaltā mujh meñ ki ġham us ke mere hote
vo jo sogvār hotā to maiñ ashk-bār hotā

ḳhizāñ ne aa ke kahā mere ġham se kyā hāsil
jahāñ bahār luTī us chaman kī baat karo

makāñ merā azal se DhūñDhtī phirtī thī vīrānī
nihāyat shauq se kī dil ne ranj-o-ġham kī mehmānī

hai ġham-e-hijr na ab zauq-e-talab kuchh bhī nahīñ
aaj tum lauT ke aa.e ho ki jab kuchh bhī nahīñ

kahiyegā us se qissa-e-majnūñ
ya.anī parde meñ ġham sunā.iyegā

tum jo aa jaao ġham dhuāñ ho jaa.e
bazm-e-jāñ rashk-e-āsmāñ ho jaa.e

ziist kī talḳhiyāñ al-amāñ phir bhī vo chhīn paa.eñ na mere laboñ se hañsī
ishq tū ne diyā vo ġham-e-shādmāñ ho ke nākām maiñ kāmyāb aa gayā

taaq o mehrāb kā ronā ho ki dīvār kā ġham
baam o dar par jo guzartī hai makīñ jānte haiñ

varaq-e-dil pe abhī naqsh hai shab-nāma-e-ġham
phir bhī har sub.h ko ham sub.h-e-hasīñ jānte haiñ

dil ko bhī ġham kā salīqa na thā pahle pahle
us ko bhī bhūlnā achchhā lagā pahle pahle

hameñ bhī nudrat-e-uslūb thī aziiz magar
unheñ jahāñ hī pukārā ġham-e-jahāñ na kahā

ġham bhī darvesh ho gayā 'fārūq'
kam nikaltā hai apne hujre se

zindagī hai ki ik hasīn sazā
ziist apnī hai ġham parā.e haiñ