Tags-Gham

ġham kā ik ātish-fishāñ thā aur maiñ
duur tak gahrā dhuāñ thā aur maiñ

khaa.e so pachhtā.e aur pachhtā.e vo bhī jo na khaa.e
ye ġham-e-ishq-e-butāñ laDDū hai goyā bor kā

chaman meñ bulbuleñ aur anjuman meñ parvāne
jahāñ meñ kaun ġham-e-ishq se ḳharāb nahīñ

ġham, aah ishq ke ġham kā koī nahīñ mausam
bahār ho ki ḳhizāñ kab ye iztirāb nahīñ

hijr kā din hai ye guzarne de
ai ġham-e-yār shaam Dhalne de

ho jo mumkin to abr barsā de
hiddat-e-ġham meñ varna jalne de

tasavvur bhī nahīñ baaqī ḳhushī kā
ġham-e-duniyā meñ yuuñ haiñ mubtalā ham

roz ke ġham ne is tarah ḳhūgar-e-zabt-e-ġham kiyā
dard hamāre dil meñ hai shikva zabān par nahīñ

majbūr-e-jabr-e-ishq haiñ muḳhtā-e-zabt-e-ġham
tum hī zarā batāo ki kyā ban ga.e haiñ ham

ab to ḳhushī hai haath meñ ġham hai na marg o ziist
al-muḳhtasar ki terī razā ban ga.e haiñ ham

aisī hī ek shaam thī jab vo chalā gayā
bas ġham se maiñ niDhāl thī aur maiñ safar meñ thī

ham maut bhī aa.e to masrūr nahīñ hote
majbūr-e-ġham itne bhī majbūr nahīñ hote

ummīd ke vādoñ se jī kuchh to bahaltā thā
ab ye bhī tire ġham ko manzūr nahīñ hote

sher ke parde meñ maiñ ne ġham sunāyā hai bahut
marsiye ne dil ke mere bhī rulāyā hai bahut

ġham-o-alam ne to kar rakhā hai hamāre chehre ko zard 'joshish'
lahū ke aañsū agar na ro.eñ na hoñ mohabbat meñ surḳh-rū ham

dard-o-ġham yās-o-alam soz-e-dil o dāġh-e-jigar
tohfe jo aap ne bheje hameñ bilkul pahuñche

rone ke bhī ādāb huā karte haiñ 'fānī'
ye us kī galī hai terā ġham-ḳhāna nahīñ hai

ishq kā zahr jo ghul jaa.e to pī lo be-ġham
jām-e-mai aur zarā tez milā lo pahle

yūñhī ruḳhsat hotī jā.egī ḳhushī
yūñhī sub.h-e-ġham nikaltī jā.egī

yūñhī gaa.e jā.eñge sher-e-'nushūr'
yūñhī tab-e-ġham bahaltī jā.egī