Tags-Gham

shab-e-ġham kī tavālat se na ghabrānā 'farah' āḳhir
ye sūraj Dhal bhī jaa.e to ise phir se nikalnā thā

matā-e-ġham ko bachā rakh chhupā ke siine meñ
tū is ḳhazāne ko auroñ meñ bāñTtā kyā hai

haqīqatoñ kā jalāl deñge sadāqatoñ kā jamāl deñge
tujhe bhī ham ai ġham-e-zamāna ġhazal ke sāñche meñ Dhaal deñge

tire ġham meñ shab yuuñ basar ho ga.ī
ġharaz rote rote sahar ho ga.ī

qayāmat ke āsār bhī ho ga.e
shab-e-ġham darāz is qadar ho ga.ī

tire ġham meñ ye haal to ho gayā
ḳhushī ab tirī fitnagar ho ga.ī

aaj tujh ko ġhair ke hamrāh ḳhush dekhā to phir
ġham jo thā tujh se bichhaḌne kā tavānā ho gayā

maanā ki terā ġham hai ġham-e-rāhat-āfrīñ
laa.eñ adā-shanās-alam dil kahāñ se ham

āzār-e-ġham vafūr-e-alam soz-e-nā-tamām
ḳhush-baḳht-o-faiz-yāb haiñ umr-e-ravāñ se ham

tū hai so apne husn ke bā-vasf ġham-nasīb
maiñ huuñ to mere haath meñ kaun-o-makāñ kahāñ

ab chhoḌiye tasavvur-e-zulf-o-mizha 'sahar'
dasht-e-ġham-e-jahāñ meñ koī sā.ebāñ kahāñ

magar falak ko adāvat usī ke ghar se thī
jahāñ 'farāz' na thā sail-e-ġham udhar bhī gayā

ġham ke hāthoñ bigaḌ ga.e ham to
vo bhī hoñge ki jo sañvarte haiñ

ḳhushī yahī hai ki ik din to ġham se chhūTeñge
na maut aa.e to kyā hāsil aise jiine se

dil ko ḳhushī bhī had se ziyāda nahīñ milī
kaase ke e'tibār se ġham bhī nahīñ milā

khaḌā huā huuñ sar-e-rāh muntazir kab se
ki koī guzre to ġham kā ye bojh uThvā de

hujūm-e-ġham vo rahā umr bhar dar-e-dil par
ḳhushī isī meñ rahī ye hujūm-e-rastā de

kyā jaane kis ke ġham meñ haiñ āñkheñ hamārī laal
ai ham ne go nasha bhī piyā phir kisī ko kyā

ġham ko vaj.h-e-hayāt kahte haiñ
aap bhī ḳhuub baat kahte haiñ

jab se chaman chhuTā hai ye haal ho gayā hai
dil ġham ko khā rahā hai ġham dil ko khā rahā hai