Tags-Gham

yuuñ to kuchh ġham se sarokār na rāhat kī talāsh
ġham koī dil ke evaz de to ḳharīdār haiñ ham

shab-e-furqat bhī jagmagā uTThī
ashk-e-ġham haiñ ki māh-pāre haiñ

haañ mirī ziist kā hāsil ġham-e-daurāñ to nahīñ
chashm-e-namnāk se aage kahīñ kuchh ho to kahūñ

ai ġham-nasīb kis se hai mumkin tirā ilaaj
ai bad-nasīb tere maraz kī davā bhī hai

ai soz-e-ġham jalā de ai dard ḳhuuñ rulā de
kuchh un kī dil-lagī kā sāmān rah na jaa.e

hujūm-e-ġham meñ tirā naam bhuul bhī jaa.e
to phir bhī jaise tirā naam lete rahte haiñ

ġham-e-hayāt kī ta.alīm-o-tarbiyat ke liye
tirī nigāh ke ahkām lete rahte haiñ

sipāh-e-ishrat pe fauj-e-ġham ne jo mil ke markab baham uThā.e
idhar to naale kā tāshā kaḌkā udhar fuġhāñ ne alam uThā.e

us javāñ ke ġham-e-hijrāñ ne kiyā hai būḌhā
ḳhizr bhī dekh ke jis but ko javānī māñge

dāstān-e-ġham-e-dil un ko sunā.ī na ga.ī
baat bigḌī thī kuchh aisī ki banā.ī na ga.ī

apne ġham se kashīd kar ke hañsī
ḳhud hī apnā fareb khāte the

nāgāh jaise bichhḌā huā ham-safar mile
ġham mil gayā to dil ko baḌī tāzgī milī

hai apnī zindagī kī ye tafsīr-e-muḳhtasar
ġham mustaqil milā to ḳhushī ārizī milī

lafz gum-sum haiñ aur in meñ hai ġham
merī ḳhāmoshiyoñ kā jāh-o-jalāl

kuchh gard-bād ġham ke umīdoñ ke kuchh sarāb
manzar hamāre dil meñ koī thal ke dekh le

hādse se hī huā ġham kā mudāvā mere
falsafa sabr kā logoñ ko paḌhāne baiThā

use kaho ġham-e-tārāji-e-chaman ho use
had bahār o ḳhizāñ se guzar ga.e ham tum

har-chand mirā ġham ġham-e-nādīda rahā hai
saaya sā magar ruuh pe larzīda rahā hai

dāstāñ ġham kī maiñ jab jab bhī likhūñ kāġhaz par
aks us māh-jabīñ kā ubhar aa.e haa.e

shab-e-ġham meñ chhā.ī ghaTā kaalī kaalī
jhukī hai balā par balā kaalī kaalī