Tags-Gham

hujūm-e-ham-nafsāñ chāra-e-alam na huā
ki is tarah ġham-e-tanhā-ravī to kam na huā

likhī ga.ī haiñ junūñ kī hikāyateñ kyā kyā
magar vo qissa-e-ġham jo kabhī raqam na huā

aur to ġham-ḳhvār saare kar chuke ġham-ḳhvārgī
ab faqat hai ek ġham kī ġham-gusārī rah ga.ī

rah gayā huuñ ban ke ik tasvīr-e-ġham
ġham ke hāthoñ haa.e kyā aalam huā

bazm-e-azā-e-dost meñ ġham na sahī tarab sahī
hañs na sako jo khul ke tum to ḳhanda-e-zer-e-lab sahī

kar diyā zaar ġham-e-ishq ne aisā mujh ko
maut aa.ī bhī to bistar pe na paayā mujh ko

zehn kī jhiil meñ khil uTThā mohabbat kā kañval
dil meñ jo ġham kā hai tūfān badal kar dekheñ

āḳhir ġham-e-jānāñ ko ai dil baḌh kar ġham-e-daurāñ honā thā
is qatre ko banñā thā dariyā is mauj ko tūfāñ honā thā

aayā hai hamāre mulk meñ bhī ik daur-e-zuleḳhā.ī yaanī
ab vo ġham-e-zindāñ dete haiñ jin ko ġham-e-zindāñ honā thā

ab khul ke kahūñgā har ġham-e-dil 'majrūh' nahīñ vo vaqt ki jab
ashkoñ meñ sunānā thā mujh ko aahoñ meñ ġhazal-ḳhvāñ honā thā

zulf ke ḳham hoñ yā jahān ke ġham
mar miTe ham jidhar se guzre haiñ

dard kī aañch ġham kī bhaTTī thī
phir sarāpā ga.e pakā.e ham

tamsīl ban ga.e haiñ samundar kī jhaag kī
sahrā-e-ġham kī raakh meñ jo bhī dhañse lage

tū gar merī bhī ho jaa.e
duniyā ke ġham yūñhī raheñge

ġham har hālat meñ mohlik hai
apnā ho yā aur kisī kā

kyuuñ na jahāñ kā ġham apnā leñ
ba.ad meñ sab tadbīreñ socheñ

jitnā chāhe mujhe ġham aur atā kar lekin
us ke hoñToñ pe tabassum kī ravānī likh de

ġham ke bādal haiñ ye Dhal jā.eñge rafta rafta
diip har gaam pe jal jā.eñge rafta rafta

ajiib turfa-tamāshā hai zindagī merī
ḳhushī bhī aa.e to ġham be-hisāb le aa.e

maiñ lauT jā.ūñgī chabūtre kī gard pūñchh kar
guzartī sā.atoñ ke ġham-daroñ meñ chīḳh jā.eñge