Tags-Gham

kuchh is qadar hai ġham-e-zindagī se dil māyūs
ḳhizāñ ga.ī to bahāroñ meñ jī nahīñ lagtā

fasāna-e-shab-e-ġham ḳhatm hone vaalā hai
'shakīl' chāñd sitāroñ meñ jī nahīñ lagtā

hijr ke ġham se na ghabrā 'jur.at'
itnā hairān nahīñ rahne kā

ġham agar saath na terā degā
phir tujhe koī nahīñ pūchhegā

suniye suniye ātish-e-ġham se hue ham jal ke ḳhaak
kahiye kahiye ab kaleja aap kā ThanDā huā

jis raaz ko chhupā na sake qais-o-kohkan
ai qalb-e-ġham-nasīb tū kaise chhupā.egā

na daa.im ġham hai ne ishrat kabhī yuuñ hai kabhī vuuñ hai
tabaddul yaañ hai har saa.at kabhī yuuñ hai kabhī vuuñ hai

kisī vaqt ashk haiñ jaarī kisī vaqt aah aur zaarī
ġharaz hāl-e-ġham-e-furqat kabhī yuuñ hai kabhī vuuñ hai

dard samundar meñ 'arshad' thiiñ shiddat-e-ġham kī lahreñ
Duub rahe the biich bhañvar maiñ aur mirī tanhā.ī

tere baġhair jī to na sakte the ham magar
ġham terā zindagī kā sahārā banā rahā

guloñ ke ruḳh pe vahī tāzgī kā aalam hai
na jaane un ko ġham-e-rozgār kyuuñ na milā

bahut ġham khāte khāte ik-na-ik din jaan jā.egī
zarar rakhtā hai ai dilbar natīja ser-ḳhorī kā

shab-e-ġham meñ fuġhāñ kartā huuñ jab tham jaate haiñ aañsū
tamāshā dekho tifl-e-ashk bhī ḳhūgar hai lorī kā

nahīñ ma.alūm ki anjām-e-mohabbat kyā ho
ġham kā ḳhud ġham kī haqīqat ne agar saath diyā

ġham-e-firāq kī be-kaifiyāñ ḳhudā kī panāh
sharāb meñ bhī to kaifiyyat-e-sharāb nahīñ

yā rañj hai yā hijr hai yā huzn hai yā ġham
kuchh shakl banā kar to musībat nahīñ aatī

ai sukūt-e-shām-e-ġham ye kyā huā
kyā vo sab bīmār achchhe ho ga.e

dil ko tere ġham ne phir āvāz dī
kab ke bichhḌe phir ikaTThe ho ga.e

nashāt-e-husn ho josh-e-vafā ho yā ġham-e-ishq
hamāre dil meñ jo aa.e vo aarzū ho jaa.e

nāḳhun-e-ġham kā nishāñ dil par hai misl-e-māh-e-nau
uñgliyāñ uThtī haiñ us zaḳhm-e-numāyāñ kī taraf