Tags-Gham

shaġhl-e-mai fart-e-ġham meñ kyā karte
is meñ thī duḳht-e-raz kī rusvā.ī

ab us ke ġham se mujh ko milegī kahāñ najāt
dil pāsbāñ hai aur nigahbān jism hai

ye log auroñ ke dukh jiine nikal aa.e haiñ saḌkoñ par
agar apnā hī ġham hotā to yuuñ dharne nahīñ dete

ehtirām-e-ġham se haiñ sūkhe jazīroñ kī tarah
varna in āñkhoñ meñ bahr-e-be-karāñ rakhte haiñ ham

bichhaḌ gayā hai vo ḳhushiyāñ sameT kar aur ġham
mujhe sambhāl gayā lauT kar nahīñ aayā

dil apne ranj-o-ġham se jām-e-jahāñ-numā thā
ab aap hī batā.eñ achchhā thā yā burā thā

har ḳhushī meñ ġham kā ik pahlū milā
har na.e ġham se ḳhushī hone lagī

un ke aane kī ḳhushī kyā chiiz thī
is ḳhushī se aur ġham paidā huā

qatīl apnā muqaddar ġham se begāna agar hotā
to phir apne parā.e ham se pahchāne kahāñ jaate

soz bhar do mire sapne meñ ġham-e-ulfat kā
maiñ koī mom nahīñ huuñ jo pighal jā.ūñgā

qadam qadam pe tirā ġham hai ḳhema-zan mirī jaañ
humak bhare bhī to āḳhir batā kahāñ bhare dil

bahut se ġham chhupe hoñge hañsī meñ
zarā in hañsne vāloñ ko TaTolo

qāfile ke ġham meñ ġham shāmil nahīñ
tum 'bakul' aage nikal aa.e bahut

har dil meñ chhupā hai tiir koī har paañv meñ hai zanjīr koī
pūchhe koī in se ġham ke maze jo pyaar kī bāteñ karte haiñ

tum ġhamoñ ko maat denā siikh lo
ashk paikar kab talak ġham khāoge

ma.āl-e-ishq-o-mohabbat se āshnā to nahīñ
kahīñ ye ġham bhī tirī tarah bevafā to nahīñ

sail-e-sarishk mere pahuñche hai ġham meñ tere
gulzār meñ ravāñ hai ai gul ye āb-jū jo

ye bhī ik phāñs bin na jaa.e kahīñ
ġham kī āsūdgī se Dartā huuñ