Tags-Gham

kyā fazā-e-sub.h-e-ḳhandāñ kyā savād-e-shām-e-ġham
jis taraf dekhā kiyā maiñ der tak hañstā rahā

jab tak junūñ junūñ hai ġham-e-āgahī bhī hai
yaanī asīr-e-naġhma mirī be-ḳhudī bhī hai

'gauhar' ġhazal se dhul to gayā kuchh ġhubār-e-ġham
har chand ye hunar sabab-e-ābrū na thā

maiñ pursish-e-ġham-e-furqat kī daad detā huuñ
tirī latīf nadāmat kī daad detā huuñ

charāġh-e-dil jalā rakkhā thā āb-o-tāb se ham ne
havā-e-ġham chalī hogī tabhī to ye bujhā hogā

tirī be-iltifātī ko ḳhudā rakhe ki ai saaqī
sharāb-e-ġham se ham tishna-laboñ par bhī ḳhumār aayā

bikhar gayā to mujhe koī ġham nahīñ is kā
ki raaz mujh pe ka.ī vā hue bikharte hue

har baar vahī hijrāñ hijrāñ kā shor machāne vaalā dil
apnī hī kare hai rishta-e-ġham tere hī saat banā.e hai

kaf-e-dard se ġham-e-kā.enāt kī gard se
vahī miT rahā hai jo naqsh sā hai nigāh meñ

aur kuchh der ġham nazar meñ rakh
kyā ḳhabar mil hī jaa.e thaah kahīñ

jo tum se milā hogā jo tum ne diyā hogā
vo ġham bhī masarrat ke sāñche meñ Dhalā hogā

ab yuuñ hī taḌapne do mujh ko mire ġhamḳhvāro
taskīn agar doge dard aur sivā hogā

guzre hue zamāne kā kuchh to nishāñ rahe
gar āshiyāñ nahīñ to ġham-e-āshiyāñ rahe

kyuuñ kar yaqīñ kareñ ki jahāñ meñ ḳhushī bhī hai
ham ko to ġham ne gher liyā ham jahāñ rahe

anjām ḳhushī kā duniyā meñ sach kahte ho ġham hotā hai
sābit hai gul aur shabnam se jo hañstā hai vo rotā hai

bedād-garoñ kī Thokar se sab ḳhvāb suhāne chuur hue
ab dil kā sahārā ġham hī to hai ab ġham kā sahārā dil hī to hai

maujūd hai filfil mujhe ġham is kā nahīñ hai
gar dekhne ko ruḳh kā tire til nahīñ miltā

tere jaane kā manzar hī ġham-ḳhvār thā
zindagī bhar jo āñkhoñ se lipTā rahā

lete añgḌā.ī haiñ ġham zaḳhm lage haiñ risne
yaad jab bhūlā huā dost purānā aayā

maanā kisī kā dard ġham-e-zindagī nahīñ
phir bhī kisī ke dard se kyā kyā gile hue