Tags-Gham

jinhoñ ne māñgī unheñ to dī hī ga.ī jahāñ meñ ḳhushī kī daulat
baġhair māñge bhī kāhiloñ par falak se ġham be-hisāb utre

ham to vābasta rahe ġham se vafā ke maare
ġham ne kyā jāniye kyūñkar hameñ chāhā hogā

yā ishrat-e-do-rozā thā yā hasrat-e-dīroz
vo lamha-e-hastī jo abhī ġham na huā thā

kisī pe ab kisī ġham kā asar nahīñ hotā
magar ye dil hai ki dukhtā hai kyā kiyā jaa.e

aatā nahīñ vo yār-e-sitamgar to kyā huā
koī ġham to us kā dil se hamāre judā nahīñ

jarāhat-e-ġham-e-daurāñ kī ibtidā kahiye
dil-e-jahāñ-zada paikān tak nahīñ aayā

bahlā rahā huuñ dil ko fareb-e-ḳhayāl se
ummīd-e-ġham-gusārī-e-yārāñ kiye hue

kabhī chhoḌī huī manzil bhī yaad aatī hai raahī ko
khaTak sī hai jo siine meñ ġham-e-manzil na ban jaa.e

nashtar-e-ġham se kam nahīñ merī asar-pazīriyāñ
der lagegī ab zarā zaḳhm ke indimāl meñ

hijr-o-visāl-o-ranj-o-ġham hasrat-o-yās-o-ārzū
har shai ubhar ke aa ga.ī mub.ham se ik savāl meñ

kyuuñ 'sahar' haal sunā.ūñ un ko
mere ġham-ḳhvār samajhte haiñ mujhe

vahī shahr hai shahr ke log vahī ġham-e-ḳhanda o sañg o salīb vahī
yahāñ aa.e haiñ kaun se aise saḳhī ki jo lutf-e-suḳhan kā savāl kareñ

pasti-e-hausla-e-shauq kī ab hai ye salāh
baiTh rahiye ġham-e-hijrāñ pe qanā.at kar ke

be-fā.eda alam nahīñ be-kār ġham nahīñ
taufīq de ḳhudā to ye nemat bhī kam nahīñ

har ek shahr meñ tanhā galī galī tanhā
maiñ phir rahā huuñ tire ġham kī laash uThā.e hue

ġham kī band muTThī meñ ret sā mirā jīvan
jab zarā kasī muTThī zindagī bikhartī hai

duur mujh se rahte haiñ saare ġham zamāne ke
terī yaad kī ḳhushbū dil meñ jab Thahartī hai

saḳht-jānī se faqat maiñ hī rahā huuñ zinda
mar ga.e varna ġham-e-hijr se kiyā kyā āshiq

diloñ meñ dard dimāġhoñ meñ kashmakash kā dhuāñ
jabīñ pe ḳhaak nigāhoñ meñ ġham kī tārīkī

vo zindagī jo sabhī ko aziiz hotī hai
ham ahl-e-ġham ke na yuuñ paas aa sakegī kabhī