Tags-Gham

aa.ī nigār-e-ġham kī sadā 'hosh' ham chale
tum imtiyāz-e-sūd-o-ziyāñ dekhte raho

jahāñ meñ aam ġham-e-rozgār thā 'nayyar'
magar vo ishq ke māroñ ke paas aa na sakā

ġham-e-duniyā ġham-e-jānāñ ġham-e-manzil ġham-e-rāh
kitne ġham ziist ke hamrāh chalā karte haiñ

ġham-e-daurāñ kī kaḌī dhuup meñ chalne vaale
ba-tamannā-e-shab-e-māh chalā karte haiñ

yād-e-māzī ġham-e-imroz umīd-e-fardā
kitne saa.e mire hamrāh chalā karte haiñ

diloñ ko mil nahīñ saktī thī ishrat-e-abadī
hazār shukr mohabbat meñ ġham kī raat bhī hai

vo ik ḳhayāl ki jis ne ġham-e-hayāt diyā
vahī ḳhayāl ilāj-e-ġham-e-hayāt bhī hai

halāk andāz-e-vasl karnā ki parda rah jaa.e kuchh hamārā
ġham-e-judā.ī meñ ḳhaak kar ke kahīñ adū kī ḳhushī na karnā

us ne ye kah ke bañdhā.ī hai mirī himmat-e-dil
aa.e haiñ ġham ke zamāne ye guzar jā.eñge

ġham yaañ to bikā huā khaḌā hai
fidvī hai fidā huā khaḌā hai

ghar se to nikal ki dar pe 'ehsān'
kyā ġham meñ ghirā huā khaḌā hai

na koī aah na koī ḳhalish na dard na ġham
vo yaad aa.e to pahroñ sukūt kā aalam

haa.e mat pūchho marīz-e-ġham kī kaifīyāt-e-karb
niiñd kyā ġhaflat sī ho jaatī hī pichhlī raat ko

'shauq' kar duuñ jo bayāñ kāvish-e-ġham kī hālat
apnā qissa bhī kam-az qissa-e-farhād na ho

mirī qismat kī kashtī bahr-e-ġham meñ Duub saktī thī
tirī taqdīr se shāyad mirī taqdīr ubhrī hai

zahe-nasīb ki duniyā ne tere ġham ne mujhe
masarratoñ kā talabgār kar ke chhoḌ diyā

ek muddat se na dekhā thā uThā kar us kā ġham
us kā ġham bhī gard meñ lipTā huā tohfa lagā

sāñsoñ ko karb ziist ġham-e-be-panāh ko
kis kis ko mutma.in maiñ karūñ ḳhvāh-maḳhvāh ko

bazm-e-yārāñ hai ye saaqī mai nahīñ to ġham na kar
kitne haiñ jo mai-kada bar-dosh haiñ yāroñ ke biich

vo terā ġham thā ki tāsīr mere lahje kī
ki jis ko haal sunāte vo rulā dete