Tags-Gham

jo marā kyuuñ marā jo luTā kyuuñ luTā jo jalā kyuuñ jalā
muddatoñ se haiñ ġham in savāloñ ke hal jo huā so huā

aap kyā soch ke ġham apnā atā karte haiñ
himmat-e-dil to ba-qadr-e-ġham-e-duniyā bhī nahīñ

kuchh manzil kā ġham baḌh jaatā kuchh rāheñ mushkil ho jātīñ
is taptī dhuup meñ zulfoñ kā saaya na milā achchhā hī huā

sab masarrat meñ saath dete haiñ
ġham uThā.eñge ham magar tanhā

ek ġham se kitne ġham paidā hue
dil hamārā phūltā-phaltā rahā

ġham kī kamī nahīñ hai jahān-e-ḳharāb meñ
ai dil taras taras ke guzārā na kījiyo

ham ye samjhe ki marham-e-ġham hai
dard ban kar davā ne luuT liyā

ulfat kā hai maza ki 'asar' ġham bhī saath hoñ
tārīkiyāñ bhī saath raheñ raushnī ke saath

shādī-o-ġham par kareñ kyā tabsira
tere mere sab ke ghar kī baat hai

mohabbat ke hasīñ ḳhvāboñ ke badle
ye kis ġham kā ishāra aañkh meñ hai

itnā nazdīk mire tū bhī kabhī aa na sakā
jitnā nazdīk mire ye ġham-e-daurāñ niklā

so gayā sunte hī vo ġham kī mire
sarguzisht us ke ta.iiñ kahānī thī

kuchh nahīñ ġham-gusārī-e-ahbāb
ehtimām-e-ġham-e-digar ke sivā

ranj-o-ġham Thokareñ māyūsī ghuTan be-zārī
mere ḳhvāboñ kī ye ta.abīr bhī ho saktī hai

vaqt achchhā bhī aa.egā 'nāsir'
ġham na kar zindagī paḌī hai abhī

jinheñ aatā ho fan auroñ ke ġham apnā.e jaane kā
unheñ tā-zindagī duniyā meñ koī ġham nahīñ hotā

mire josh-e-ġham kī hai ajab kahānī
kabhī uThtā sho.ala kabhī bahtā paanī

jo ḳhushī hai faanī to hai ġham bhī faanī
na ye jāvedānī na vo jāvedānī

bhulā deñ yā kareñ ham yād-e-ġham yuuñ bhī hai aur yuuñ bhī
kisī ke hijr meñ ḳhud chashm-e-nam yuuñ bhī hai aur yuuñ bhī