Tags-Gham

abhī manzar badalte hī badal jā.eñge sab chehre
bichhaḌte vaqt kā ġham hai abhī tū nam na kar āñkheñ

dil ne shab-e-furqat meñ kyā saath diyā merā
mūnis ise kahte haiñ ġham-ḳhvār ise kahte haiñ

is kā nahīñ hai ġham koī jaañ se agar guzar ga.e
dikh kī añdherī qabar par ham bhī charāġh dhar ga.e

tumhāre ba.ad daulat-e-ġham-e-jahān mil ga.ī
duā qubūl ho ga.ī malāl de diyā gayā

duniyā hameñ dīvāna samajhtī hai to samjhe
ham aam ġham-e-dil kā chalan karte raheñge

kaifiyat shāḳh-e-nihāl-e-ġham kī 'ishrat' sub.h-o-shām
āte-jāte mausamoñ ke qāfile likhte rahe

kabhū dil rukne lagtā hai jigar gaahe taḌaptā hai
ġham-e-hijrāñ meñ chhātī ke hamārī jam haiñ ye donoñ

DhūñD kuchh log muqābil huuñ jahāñ maiñ tere
shar-e-nāqis meñ kahāñ ham se haiñ ġham-ḳhvār miyāñ

uTThī hai jab se dil meñ mire ishq kī tarañg
shādī o ġham haiñ aage mire donoñ ek rañg

'sāhil' jab un ko koī Thikāna nahīñ milā
ġham un ke saare mere hī dil meñ Thahar ga.e

do tum itnā ġham ki āsānī se jitnā uTh sake
āzmāo tāqat-e-bīmār-e-hijrāñ dekh kar

gar kisī jashn-e-masarrat meñ chale bhī jaa.eñ
chun ke aañsū tire ġham-ḳhvār uThā lā.eñge

ka.ī chehroñ kā ġham hai is meñ shāmil
hamārā hai kahāñ chehra hamārā

intihā ġham kī is ko kahte haiñ
zaḳhm ko bhī hañsī nahīñ aatī

ab to mahfil se bhī hotā nahīñ kuchh ġham kā ilaaj
pahle tanhā.ī bhī dukh baañT liyā kartī thī

āñkhoñ meñ ḳhuun thā ki zamīñ thī lahū lahū
zanjīr-e-ġham pahan ke tamāshā bhī the hamīñ

kashtī ke Dūbne kā mujhe ġham nahīñ magar
maujoñ kī sāz-bāz meñ dariyā sharīk thā

nahīñ hai dozaḳh kā dil ko kuchh ġham mirī bhī sun nāsehā zarā tham
rahīm vo pur-gunāh haiñ ham azaab kaisā savāb kaisā

tirī ḳhātir se zāhid ham ne tauba aaj kī varna
ghaḌī bhar ġham ġhalat karne ko bas vo chiiz thī achchhī

ziyāda ai falak de rañj-o-rāhat ham ko jo kuchh de
na do din kā ye ġham achchhā na do din kī ḳhushī achchhī