Tags-Gham

jaan kā ġham nahīñ ġham ye hai ki aap
qatl kar ke mujhe pachhtā.iyegā

ham Duub jaa.eñ apne hī ġham ke bahāo meñ
haañ haañ ġhalat ġhalat mire yaarā bahut ġhalat

tārāj-e-kāvish-e-ġham-e-hijrāñ huā 'asad'
siina ki thā dafīna gohar-hā-e-rāz kā

āñkhoñ pe shab raqam bhī nahīñ kar sakūñgā maiñ
ai ḳhvāb terā ġham bhī nahīñ kar sakūñgā maiñ

ġham-e-duniyā ko bas merī taraf aane kī jaldī hai
har achchhe vaqt ko mujh se bichhaḌ jaane kī jaldī hai

jab har nazar ho ḳhud hī tajallī-numā-e-ġham
phir aadmī chhupā.e to kaise chhupā.e ġham

us vaqt tak milī na mujhe lazzat-e-hayāt
jab tak rahā zamāne meñ nā-āshnā-e-ġham

merī nigāh-e-shauq hī ġham kā sabab nahīñ
un kī nigāh-e-nāz bhī hai rahnumā-e-ġham

saudā-e-ishq dard-e-mohabbat jafā-e-dost
ham ne ḳhushī ke vāste kyā kyā uThā.e ġham

shāyad ye hai karishma fareb-e-nashāt kā
ghabrā ke aa ga.ī hai laboñ par duā-e-ġham

'farhat' kī har hañsī meñ haiñ aañsū chhupe hue
us kī ḳhushī bhī oḌhe hue hai ridā-e-ġham

saaqī ke karam se faiz ye jaarī hai
yā pīr-e-ḳhar kī ġham ḳhvārī hai

aaj ruḳhsat ho gayā duniyā se ik bīmār-e-ġham
dard aisā dil meñ uTThā jaan le kar hī gayā

ġham is kā kuchh nahīñ hai ki maiñ kaam aa gayā
ġham ye hai qātiloñ meñ tirā naam aa gayā

bichhaunā bhī nahīñ hai aaj 'tālib'
taḌap ġham niiñd aañsū kyā bichhā.eñ

maiñ farq batā.ūñ kis kis ko ehsās kī jab taufīq nahīñ
kaif-e-ġham-e-daurāñ merā hai lutf-e-ġham-e-jānāñ merā hai

chal fanā ke safar meñ yahī raḳht hamrāh le kar chaleñ
is qadar muḳhtasar zindagī meñ to ġham ḳharch hogā nahīñ

ye zamān-o-makāñ kā sitam bhī nayā
terā ġham bhī nayā, merā ġham bhī nayā

aañkh kahtī hai ġham ke afsāne
ek aisī ghaḌī bhī hotī hai

ġham kī rūdād pūchhne vaale
āñsuoñ kī zabān hotī hai