Tags-Gham

ye hujūm-e-ġham-e-daurāñ meñ kahāñ yaad rahā
dāstān-e-ġham-e-dil tere taġhāful se kahūñ

badlā hai magar bhes ġham-e-ishq kā tū ne
bas ai ġham-e-daurāñ tujhe pahchān ga.e ham

shiddat-e-ġham se milā ziist ko mafhūm nayā
ham samajhte the ki dil jiine se bhar jā.egā

us ke milne se na hotī raushnī
ghaT to jaatī ġham kī zulmat kam se kam

kyuuñ ġham-e-daurāñ ziyāda mil gayā
thī hameñ jis kī zarūrat kam se kam

daulat-e-ġham kī farāvānī sahī
dāman-e-dil meñ hai vus.at kam se kam

ġham nahīñ jo chand yādeñ saath thiiñ
kar to lī dil kī hifāzat kam se kam

tire ġham ne sab kaam āsāñ kiye haiñ
ki marnā bhī āsāñ huā chāhtā hai

dil bhī thā muñh se bas ik aah nikal jaane tak
aag siine meñ lagā kar ġham-e-pinhāñ niklā

chārāgar nāseh-e-mushfiq dil-e-be-sabr-o-qarār
jo milā ishq meñ ġham-ḳhvār vo nādāñ niklā

tū ne pūchhā hai mire dost to maiñ sochtī huuñ
vo jo ik chiiz hai duniyā jise ġham kahtī hai

kaash koī ġham-gusār aa.e madārāteñ kare
mom-battī kī pighaltī raushnī ke karb meñ

har ek chiiz mayassar sivā.e bosa hai
aur apne ġham kā sabab iltavā-e-bosa hai

kis qadar mahdūd kar detā hai ġham insān ko
ḳhatm kar detā hai har ummīd har imkān ko

tirī yaad jo mere dil meñ hai bas usī kī jalvagarī rahī
mirā ġham bhī tāza-ba-tāza hai mirī shāḳh-e-fan bhī harī rahī

agarche dard kī tarsīl kā vāhid hai baa.is
junūñ pesha ne terā ġham gañvānā bhī nahīñ hai

kise maiñ DhūñDhtī apnī ḳhushī meñ
tumhāre ġham se fursat hī nahīñ thī

shām-e-ġham se shab-e-andoh se chashm-e-tar se
baaz aayā maiñ tirī yaad ke us lashkar se

aaj jaltī huī har sham.a bujhā dī jaa.e
ġham kī tauqīr zarā aur baḌhā dī jaa.e

ye nasīb-e-ishq kī gardisheñ ki zamāñ makāñ se guzar ke bhī
vahī āsmāñ vahī shām-e-ġham vahī shām-e-ġham kī sahar bhī hai