Tags-Gham

qaid-e-hayāt o band-e-ġham asl meñ donoñ ek haiñ
maut se pahle aadmī ġham se najāt paa.e kyuuñ

raheñ ġham kī sharar-añgeziyāñ yā-rab qayāmat tak
'hayā' ġham se na miltī gar kabhī fursat to achchhā thā

vahī fareb-e-dushmanāñ hai is kā ġham nahīñ hameñ
hameñ to ġham ye hai ḳhulūs-e-dostāñ badal gayā

sūraj kī tez dhuup se shāyad amaañ mile
ruktī hai ġham kī dhuup kahīñ sā.ebān se

hañsne meñ rone kī aadat kabhī aisī to na thī
terī shoḳhī ġham-e-furqat kabhī aisī to na thī

kisht-e-ġham aur bhī lahrāne lagī hañsne lagī
chashm-e-nam terī sharārat kabhī aisī to na thī

kitne ġham bhuul gayā shukriya terā ġham-e-yār
yuuñ mujhe terī zarūrat kabhī aisī to na thī

ġham kī tashrīh hañsī-khel nahīñ hai koī
pahle insān tū bin phir ye hunar paidā kar

dhyān meñ mela sā lagtā hai biitī yādoñ kā
aksar us ke ġham se dil kī sohbat rahtī hai

palkoñ pe larazte rahe 'anvar' jo shab-e-ġham
mujh ko unhīñ tāroñ kī ziyā yaad rahegī

har ek titlī pe bār-e-ġham hai aur andalīboñ kī aañkh nam hai
jahāñ pe ab ḳhaak uḌ rahī hai yahīñ kahīñ gulistāñ thā pahle

ġham kā har aalam nayā hai in dinoñ
dil kī har duniyā na.ī hai āj-kal

jal rahī hai dil meñ sham-e-ārzū
ġham-kade meñ raushnī hai āj-kal

arz-e-ġham par muskurāte bhī nahīñ
barhamī sī barhamī hai āj-kal

qahqaha mārte hī dīvāna
har ġham-e-zindagī ko bhuul gayā

ham idhar aa.e to vo arz-e-karam chūTegī
mamlikat ishq kī thī ġham ke ḳhazāne the udhar

niiñd āñkhoñ meñ hai kam kam mujhe āvāz na do
jaag jā.egā koī ġham mujhe āvāz na do

apne majbūr pe kuchh aur karam ho ki use
kam paḌī jaatī hai ab ġham kī farāvānī bhī

ai hujūm-e-nā-murādī ai vufūr-e-yās-o-ġham
ishq meñ kuchh lutf-e-sa.ī-e-nā-tamām aayā to kyā

ġham-e-āfāq meñ aarif agar karvaT badaltā hai
syāhī se qalam kī nuur kā mīnār Dhaltā hai