Tags-Gham

zulmat-e-ġham jab ziyāda ho 'imām'
sham-e-fikr-o-fan jalāyā kījiye

zahr-e-tanhā.ī-e-ġham pī ke mohabbat meñ 'ḳhayāl'
kis tarah maut ko jiine kā sahārā kahiye

ye ġham-kada hai is meñ 'mubārak' ḳhushī kahāñ
ġham ko ḳhushī banā koī pahlū nikāl ke

ham ne tumhāre ġham ko haqīqat banā diyā
tum ne hamāre ġham ke fasāne banā.e haiñ

samundar āsmāñ is par sitāroñ kā safīna
mirā mahtāb-e-ġham hai be-karānī dekhne meñ

huī jo bārish-e-ġham to badal ga.e manzar
zarā sī der meñ kyā kyā dikhā gayā paanī

mansūb umr-e-rafta ye e.azāz kam nahīñ
ik shaḳhs muntahā-e-ġham-e-e'tibār thā

ye havā-e-ġham ye fazā-e-nam mujhe ḳhauf hai ki na Daal de
koī parda merī nigāh par koī raḳhna tere jamāl meñ

merī vahshat mire ġham ke qisse
log kyā kyā na sunā.eñge tumheñ

tasvīr ke do ruḳh haiñ jaañ aur ġham-e-jānāñ
ik naqsh chhupānā hai ik naqsh dikhānā hai

ek ġham aur muntazir hai mirā
ek ġham se guzar chukā huuñ maiñ

roz āñkhoñ meñ jhūTe ashk bilotā huuñ
ġham kī ek shabīh utarvā rakkhī hai

ba-juz ḳhayāl-e-ġham-e-mohabbat koī mirā ham-safar nahīñ hai
maiñ ab vahāñ se guzar rahā huuñ jahāñ kisī kā guzar nahīñ hai

uTThe jis bazm se tum ġham kā samāñ chhoḌ aa.e
diye mahfil se uThā laa.e dhuāñ chhoḌ aa.e

na chalā ba.ad hamāre koī rāh-e-ġham meñ
jise har-gām pe ik sañg-e-girāñ chhoḌ aa.e

bhīge hue ġham meñ sar se pā tak
dariyā-e-hunar se aa rahe haiñ

ye ġham ke tuyūr be-tahāshā
ik dil ke shajar se aa rahe haiñ

āñkhoñ ke ġham-kadoñ meñ ujāle hue to haiñ
buniyād ek ḳhvāb kī Daale hue to haiñ

zaḳhmī huī hai ruuh to kuchh ġham nahīñ hameñ
ham apne dostoñ ke havāle hue to haiñ

ġham-ḳhāna sanam-ḳhāna aivāñ yā ḳhāna-e-vīrāñ kyā hogā
qissa hai dil-e-dīvāna kā hairāñ huuñ ki unvāñ kyā hogā