Tags-Gham

naġhma vo kis ne chheḌā hai bichhḌe hue ġham sab aan mile
āvāz kī lahroñ par larzāñ sau mohr-ba-lab tasvīreñ haiñ

dil vahī ashk-bār rahtā hai
ġham se jo ham-kanār rahtā hai

kaash aisā bhī koī lamha mayassar aa jaa.e
ishq kī baat bane ġham kī pazīrā.ī ho

zindagī aise kaTī tāna-o-dushnām ke saath
merā honā bhī mire ġham kā shanāsā.ī ho

barastī āñkhoñ se sūkhe tālāb bhar na paa.eñ
ye ġham kā dariyā misāl-e-qarz-e-sahāb dekhā

hameñ to muskurāne ke sivā kuchh bhī nahīñ aatā
hujūm-e-ġham meñ bhī ham log yuuñ hī muskurāte haiñ

azal ke din se ġham mushtāq thā jo merī ḳhilqat kā
banāyā āñsuoñ se gūñdh kar putlā kudūrat kā

jo shāmil hai karam us kā to kyā ġham kisht-e-uqbā kā
siyah-nāmī se apne kaam lūñgā abr-e-rahmat kā

ḳhudā ne dī hai lazzat ġham-ḳhurī kī ḳhush-mazāqoñ ko
lahū kī ghūñT piine meñ mazā miltā hai sharbat kā

vo aalam hai na ġham se ġham na shādī se mujhe shādī
barābar mere mīzāñ meñ hai palla rañj-o-rāhat kā

mazā ishq-e-haqīqī meñ na kuchh ishq-e-majāzī meñ
ḳhudā se ġham duī kā hai sanam se rañj furqat kā

tū ne 'aḳhlāq' qasam khaa.ī thī zabt-e-ġham kī
phir ye palkoñ pe namī hoñToñ pe naale kaise

ġham kī sauġhāt hai ḳhamoshī hai
chāñdnī raat hai ḳhamoshī hai

sub.h-e-nau ho ki shām-e-ġham 'aslam'
gosha-e-zāt hai ḳhamoshī hai

raushan na ho sakī kabhī ye shām-e-ġham mirī
maiñ ne jalā.e diip ka.ī e'tibār meñ

zarā Thahr ki ab anjām-e-soz-e-ġham hai qarīb
charāġh-e-zīst bhaḌakne ko hai bujhā.e jā

galā ghoñTā hai zabt-e-ġham ne kuchh aisā ki mushkil hai
ki nikle muñh se āvāz-e-shikast-e-dil fuġhāñ ho kar

huī phir dekhiye aa bustan-e-shādī-o-ġham duniyā
abhī paidā hue the rañj-o-rāhat to amaañ ho kar

dushman ko lutf-e-vasl 'hasan' ko ġham-e-firāq
har shaḳhs kā judā hai muqaddar judā nasīb

zarā nigāh uThāo ki ġham kī raat kaTe
nazar nazar se milāo ki ġham kī raat kaTe