Tags-Gham

ai hañsne hañsāne vaale jā afsurdagi-e-dil baḌhtī hai
jis ko ho azal se nisbat-e-ġham hañsne se vo ḳhandāñ kyā hogā

ġham tumhārā nahīñ jānāñ hameñ dukh apnā hai
tum bichhaḌte ho to ham ḳhud se bichhaḌ jaate haiñ

āñkhoñ se ojhal honā kyā dil se ojhal honā hai
tujh se chhuT kar bhī ahl-e-ġham kyā tujh se chhuT jā.eñge

aap ke dard se rishta hai mire dil kā 'ra.īs'
kaun kahtā hai ki maiñ aap kā ġham-ḳhvār nahīñ

ġham-e-zamāna jab na ho ġham-e-vajūd DhūñD luuñ
ki ik zamīn-e-jāñ jo hai vo dāġhdār chāhiye

bhalā kab dekh saktā huuñ ki ġham nākām ho jaa.e
jo ārām-e-dil-o-jāñ hai vo be-ārām ho jaa.e

ġham-e-dil hai magar āḳhir ġham-e-dil kyā kahe koī
fasāna muḳhtasar ho kar jab un kā naam ho jaa.e

evaz davā ke duā de gayā tabīb mujhe
kahā jo maiñ ne ġham-e-hijr se do-chār huuñ maiñ

asar aisā hai tap-e-ġham meñ davā kā ulTā
nabz dekhe to ho bīmār masīhā ulTā

ḳhafaqān-e-ġham-e-furqat se dil aisā ulTā
muñh ke bāhar nikal aayā jo kaleja ulTā

sā.at-e-ġham bhī kyā muḳhtasar ho ga.ī
terī yaad aa.ī thī ki sahar ho ga.ī

thā na juz ġham bisāt-e-āshiq meñ
ġham ko rāhat-fazā kiyā tū ne

un se bhī ilāj-e-ġham pinhāñ nahīñ hogā
kah deñ jo agar un kā shanāsā koī guzre

jo āstāñ ho use sañg-e-dar kā ġham kaisā
jo ḳhud safar ho use rahguzar kā ġham kaisā

farāz-e-koh-e-shab-e-ġham se dekhnā hai use
mire ḳhudā mirī qismat meñ rat-jage rakhnā

phirūñ 'mīr' uryāñ na dāman kā ġham ho
na baaqī rahe ḳhār-ḳhār-e-garebāñ

zindagī sirf ġham huī 'hirmāñ'
ab kisī ġham kā ehtimāl kahāñ

rone vāloñ ne tire ġham ko sarāhā hī nahīñ
raat ḳhush rah ke bhī kaT saktī hai sochā hī nahīñ

takmīl-e-ārzū kī ḳhushī aur ġham-e-hayāt
donoñ hī ibtidā se rahe intihā ke saath

shāmil mirī hayāt meñ yuuñ hai ġham-e-hayāt
jaise ḳhabar ho apne kisī mubtadā ke saath