Tags-Gham

maiñ apne miTne ke ġham meñ nālāñ udhar zamāna hai shaad o ḳhandāñ
ishāra kartī hai chashm-e-daurāñ jo aan baaqī jahān baaqī

be-kaifiyoñ ke kaif meñ ham aise mast the
ehsās-e-lazzat-e-ġham-e-daurāñ nahīñ huā

jis ne sab ke ġham bāñTe haiñ ham vo dīvāne haiñ 'shafīq'
ye vo daur hai jis meñ har ik apnī aag bujhā.e hai

is shahr-e-ḳharābī meñ ġham-e-ishq ke maare
zinda haiñ yahī baat baḌī baat hai pyāre

kuchh aur bhī haiñ kaam hameñ ai ġham-e-jānāñ
kab tak koī uljhī huī zulfoñ ko sañvāre

'ābrū' ġham ke bhañvar meñ dil ḳhudā setī lagā
nāḳhudā kuchh kaam aatā nahiñ hai mañjdhāroñ ke biich

sho.ala-e-ġham ko rag-e-jāñ meñ kiyā jazb to phir
har nazar sūrat-e-ḳhurshīd nazar aa.ī hai

lazzat-e-ishq se bharpūr ġham-e-dil kī sadā
parda-e-shab meñ ka.ī chāñd uḌā laa.ī hai

ġham se nisbat hai jinheñ zabt-e-alam karte haiñ
ashk ko zīnat-e-dāmāñ nahīñ hone dete

suljhe na masā.il ġham o aflās ke lekin
tafsīr-e-masā.il meñ qalam TuuT rahe haiñ

vahī sab thā
vahī ġham thā vahī rab thā

us ke bayān se hue har-dil-azīz ham
ġham ko samajh rahe the chhupāne kī chiiz ham

chaaT jaa.e na mujhe dīmak sā
ġham jo siine se mire lipTā hai

maiñ bhī kuchh ḳhvāb sar-e-shahr-e-tamnnā le kar
sar meñ irfān-e-ġham-e-zāt kā saudā le kar

sūrat-e-ishq badaltā nahīñ tū bhī maiñ bhī
ġham kī hiddat se pighaltā nahīñ tū bhī maiñ bhī

use maiñ ḳhaas karam meñ shumār kartā huuñ
jo tū marāhil-e-ġham se guzārtā hai mujhe

merī hālat use na batlānā
vo sunegā to us ko ġham hogā

rāz-hā-e-zabt-e-ġham kyā chhup sakeñ
hoñT jab ḳhāmosh hoñ chehra kahe

'nushūr' āḳhir kahāñ tak fikr-e-duniyā dil dukhā.egī
ġham-e-hastī ko zauq-e-sher kartā jā rahā huuñ maiñ

yahāñ kisī kā koī ġham-gusār kyuuñ hogā
ki fā.eda hī nahīñ ġham-gusār hone meñ