Tags-Gham

hayāt-o-maut kā maqsad samajh meñ aa nahīñ saktā
vagarna aadmī majbūr-e-ġham yuuñ bhī hai aur yuuñ bhī

shab-gazīda ko tire is kī ḳhabar hī kab thī
din jo aa.egā ġham-e-lā-mutanāhī degā

ġham kī daulat baḌī mushkil se milā kartī hai
sauñp do ham ko agar tum se nigahbānī na ho

kyūñkar luTā.ī dil kī ye maiñ ne mohabbateñ
kuchh ġham nahīñ jo koī shanāvar nahīñ huā

koī nazr-e-ġham-e-hālāt na hone paa.e
aur har baat ho ye baat na hone paa.e

na ġham-e-yār hai mujh ko na ġham-e-daurāñ hai
āḳhir ab ziist meñ bhī is qadar āsānī kyā

sach ye hai be-kār hameñ ġham hotā hai
jo chāhā thā duniyā meñ kam hotā hai

hādse ziist kī tauqīr baḌhā dete haiñ
ai ġham-e-yār tujhe ham to duā dete haiñ

shahr-āshob likhūñ shahr-e-tamannā likkhūñ
ai dayār-e-ġham-e-jānāñ meñ tujhe kyā likhūñ

gar aish se ishrat meñ kaTī raat to phir kyā
aur ġham meñ basar ho ga.ī auqāt to phir kyā

kisī ko mohlat-e-hastī bhī de ġham-e-jānāñ
ye kyā ki aa.e koī to palaT ke ghar hī na jaa.e

nigāh-e-yār, ġham-e-jāñ-gusil kā kyā hogā
tire karam se nasīb-e-vafā sañvar hī na jaa.e

bahut udaas hai dil jaane mājrā kyā hai
mire nasīb meñ ġham ke sivā dharā kyā hai

ġham-e-paiham huī sābit jise maiñ ne baqā samjhā
hayāt-e-jāvidāñ niklī jise maiñ ne qazā samjhā

yaas hai hasrat hai ġham hai aur shab-e-dījūr hai
itne sāthī haiñ magar tanhā dil-e-ranjūr hai

terā jaanā thā ki ġham-ḳhāne pe vahshat chhā ga.ī
maiñ ye samjhā thā mire ghar se bayābāñ duur hai

ġhairoñ kī ḳhalish apnoñ kī lagan soz-e-ġham-e-jānāñ dard-e-vatan
kyā kahiye ki ham haiñ kis kis ko siine se lagā.e zindāñ meñ

tirī nigāh-e-karam hai vagarna ai ġham-e-dost
zamāna kyā tire shaidā.iyoñ se ḳhālī hai

ab ahl-e-bazm ġham-e-tīrgī kareñ to kareñ
hamāre paas to jo sham.a thī jalālī hai

ham haiñ maqtal meñ aur qātil ġham
kaise laa.e ga.e the qahr meñ ham