Tags-Gham

ġham-e-jahāñ meñ ġham-e-yār zam na kar paayā
hazār kaam kiyā ''maiñ'' ko ''ham'' na kar paayā

mujhe ye dukh ki bichhaḌne kā vaqt thā hī nahīñ
use malāl ki iz.hār-e-ġham na kar paayā

yuuñ to hañste hue laḌkoñ ko bhī ġham hotā hai
kachchī umroñ meñ magar tajraba kam hotā hai

terā har ġham hai tarab-ḳhez tire ġham kī qasam
shiddat-e-dard se masrūr huā jaatā huuñ

tujhe taknā tujhe sunñā tirā hañsnā machal jaanā
hamāre ġham ke āñgan meñ faqat do-chār ḳhushiyāñ haiñ

ka.ī haiñ dāstāneñ dafn yaañ yāroñ ke siine meñ
kahīñ par ġham hai ḳhushiyoñ meñ kahīñ ġham-ḳhvār ḳhushiyāñ haiñ

amīr-e-shahr kyā jaane jo guzrī hai ġharīboñ par
yahāñ par ġham ke phere haiñ vahāñ har baar ḳhushiyāñ haiñ

mire zauq-e-fanā par zindagī hai ḳhizr kī qurbāñ
mire talḳhāna-e-ġham meñ Dubo do āb-e-haivāñ ko

saaf jazboñ ke havāle se to ġham haiñ lekin
ek lamhe kī ḳhushī ek sadī rahtī hai

arz-e-ġham kyuuñ na un se kar dekhūñ
ab bhī thoḌī sī rasm-o-rāh to hai

yā ta.alluq kuchh na thā yā aap ko
ġham hamāre ho ga.e itne aziiz

kyā ajab jo dard-o-ġham ruḳhsat hue
vo bhī the āḳhir 'rasā' apne aziiz

qistoñ meñ 'nazīr' un se hāl-e-ġham-e-dil kahnā
kuchh aaj sunā denā kuchh kal pe uThā rakhnā

miTā de ḳhud hameñ gar shikva-e-ġham miT nahīñ saktā
jafā-e-yār se ye āḳhirī apnī guzārish hai

ye ġham kī lambī añdherī shab kis tarah kaTegī
ufuq pe dil ke koī kiran to uchhāl denā

mujh ko is kā ġham nahīñ sailāb meñ ghar bah ga.e
muskurāyā huuñ maiñ be-mausam kī barkhā dekh kar

ulfat kā dard-e-ġham kā parastār kaun hai
duniyā meñ āñsuoñ kā talabgār kaun hai

dam-ba-dam kahte ho kyuuñ fikr meñ nāhaq tū hai
ġham ko kyā kaam mirā sar hai mirā zaanū hai

hañse vo laakh magar zabt-e-ġham kī tahrīreñ
na chhup sakeñgī ki chehra kitāb jaisā hai

sulag rahe ho yūñhī ġham kī dhuup se 'rāshid'
vo haath chuum ke dekho gulāb jaisā hai