Tags-Gham

ab koī ġham hī nahīñ hai jo rulā.e mujh ko
aisā mausam hī nahīñ hai jo rulā.e mujh ko

kyuuñ sar-ḳhush-e-raftār na ho ho qāfila-e-mauj
rahzan kā hai andesha na ġham zād-e-safar kā

ham ko ḳhushī milī bhī to bas aarzī milī
lekin jo ġham mile vo ġham-e-jāvedāñ mile

ahl-e-sitam kī dil-shikanī kā sabab huā
dil kā ye hausla ki ġham be-karāñ mile

ham to Thahre ġham ke maare jiine ko jī hī leñge
kyā hogā dar-chashm-e-subū-bar-dosh chaman-bardāroñ kā

dil hai lazzat-e-ġham kā ḳhūgar sunte hī chauñk uThtā hai
zikr koī jab chhiḌ jaatā hai un nāzuk talvāroñ kā

tūfānī hai ġham kī kahānī phir vo kahāñ mauzū-e-ġhazal
baat banātunna.ash kī chheḌo zikr karo mah-pāroñ kā

bharī duniyā meñ apne bhī haiñ begāne bhī haiñ lekin
nahīñ hamdard ab merā tire ġham ke sivā koī

yuuñ ġham-e-dil kī zabāñ mahkī hai
nik.hat-e-zulf-e-dotā ho jaise

hujūm-e-jashn meñ kartā hai ġham-zadoñ ko talāsh
mujhe junūñ ne ajab imtihāñ meñ Daalā hai

sīna-kūbī kar chuke ġham kar chuke
jīte-jī ham apnā mātam kar chuke

ātish-e-ġham se banāyā hai mire siine meñ
dil ko añgāre kī mānind dahakne ke liye

ham ko duniyā se shikāyat hai kuchh is andāz kī
thī kabhī duniyā ko jaise qadr-e-ġham jaatī rahī

rah gayā siine meñ ġham āsār-e-ġham zāhir nahīñ
ġhamgusāroñ se bhī ab chashm-e-karam jaatī rahī

badal sakā na judā.ī ke ġham uThā kar bhī
ki maiñ to maiñ hī rahā tujh se duur jā kar bhī

mire ghar ke log jo ghar mujhī ko supurd kar ke chale ga.e
mirā bār-e-ġham na uThā sake to mujhī pe dhar ke chale ga.e

yuuñ to ashkoñ se bhī hotā hai alam kā iz.hār
haa.e vo ġham jo tabassum se ayaañ hotā hai

ham rahīn-e-ġham-e-hayāt rahe
maut aa.ī nasīb vāloñ ko

ye bahut ġham kī baat ho shāyad
ab to ġham bhī gañvā chukā huuñ maiñ

ye ḳhud-pasand sā ġham hai so ye umiid bhī kam hai
ki apne bhed kabhī tujh pe āshkār karegā