Tags-Gham

tū to ma.ashūq hai tujh ko to bahut āshiq haiñ
ġham unhoñ kā hai jo vo jaan se nirmūl ga.e

ma.āz-allāh us kī vārdāt-e-ġham ma.āz-allāh
chaman jis kā vatan ho aur chaman-be-zār ho jaa.e

mirā dil hai dasht-e-ġham jahāñ kabhī aa ke sair to kījiye
ye junūñ junūñ kī musāfirat ye vatan vatan kī udāsiyāñ

ḳhurd-bīnoñ se ka.ī daaġh chhupā.e apne
ġham-gusāroñ ne koī bhed na paayā apnā

tum ho sharīk-e-ġham to mujhe koī ġham nahīñ
duniyā bhī mire vāste jannat se kam nahīñ

ai shām-e-ġham kī gahrī ḳhamoshī tujhe salām
kānoñ meñ ek aa.ī hai āvāz duur kī

rotā huuñ shām-o-sahar TukḌe hai ġham se jigar
bedard kuchh rahm kar merā burā haal hai

kyā kahiye kyā ġham sahā din-rāt rotā rahā
dil ḳhuun ho kar bahā rañgīn rūmāl hai

donoñ jahān terī mohabbat meñ haar ke
vo jā rahā hai koī shab-e-ġham guzār ke

qafas hai gosha-e-rāhat qafas hai dār-e-amāñ
ġham-e-chaman bhī nahīñ fikr-e-āshiyāñ bhī nahīñ

hālāt ġham-e-dil kah na sake aur dard-e-darūñ bhī sah na sake
aañsū jo hisār-e-chashm meñ the palkoñ ke sahāre aa pahuñche

koī apne hī ġham se ḳhālī kahāñ hai
jahāñ meñ koī merā ġham-ḳhvār kyuuñ ho

mire ġham kī ḳhabar 'irshād' duniyā ko huī kaise
bhare tālāb meñ kañkar girā kar dekh letā huuñ

ġham hai ki musalsal usī shiddat se hai jaarī
yuuñ kahne ko is umr kā har lamha nayā hai

mahsūs kiyā hai kabhī tū ne bhī vo ḳhanjar
ġham ban ke jo har shaḳhs ke siine meñ gaḌā hai

ham na hoñge to ai ġham-e-jānāñ
kis ko yārā-e-ārzū hogā

ye tabī.at hai to ḳhud āzār ban jā.eñge ham
chāragar ro.eñge aur ġham-ḳhvār ban jā.eñge ham

kyā baat hai nazroñ se añdherā nahīñ jaatā
kuchh baat na kar lī ho shab-e-ġham ne sahar se

ġham ke hāthoñ shukr-e-ḳhudā hai ishq kā charchā aam nahīñ
galī galī patthar paḌte hoñ ham aise badnām nahīñ

merī mizha-e-ġham par larzāñ hai haqīqat sī
un ke lab-e-la.alīñ par afsāna machaltā hai