Tags-Gham

ġham-e-jahān o ġham-e-yār do kināre haiñ
udhar jo Duube vo aksar idhar nikal aa.e

ban meñ sargoshī huī āsār-e-abr-o-bād se
band-e-ġham se jaise ik ashjār kā lashkar khulā

tumhārī furqat meñ kyā milegā tumhāre milne se kiyā milegā
'qamar' ke hoñge hazār-hā ġham raqīb ko ik ḳhushī milegī

ye duniyā ashk se ġham nāptī hai
agar maiñ zabt kar ke rah gayā to

kis dil se ārzū-e-ḳhushī kījiye ki ab
his tak ḳhushī kī miT ga.ī ġham is qadar mile

zindagī uljhī hai bikhre hue gesū kī tarah
ġham piye jaate haiñ umDe hue aañsū kī tarah

shab-e-furqat meñ bhī tanhā.ī mayassar na huī
laakh ġham ghere rahe mujh ko jafā-jū kī tarah

roz-e-azal yuuñ paidā huā dil
lī ġham ne karvaT aur ban gayā dil

dil jī rahā hai ġham ke sahāre
jab miT gayā ġham samjho miTā dil

aur aage na baḌhā qissa-e-dil qissa-e-ġham
dhaḌkaneñ chup haiñ sarishk-e-sar-e-mizhgāñ chup hai

tamām raat āñsuoñ se ġham ujāltā rahā
maiñ ġham ujaal ujaal kar ḳhushī meñ Dhāltā rahā

sunahrī sā.ateñ mansūb haiñ tire ġham se
palaT ke dekh zarā merī zindagī kā varaq

shāyad us ko ġham kā Dar hai
jab dekho hañstā rahtā hai

har ġham sahnā aur ḳhush rahnā
mushkil hai āsān nahīñ hai

tabassum-e-lab-e-jānāñ se khelne vaale
ġham-e-vafā ko ġham-e-zindagī samajhte haiñ

ye zarf apnā hai 'nāzir' ki is zamāne ne
jo ġham diyā hai use ham ḳhushī samajhte haiñ

faqīh-e-shahr kī bātoñ se dar-guzar behtar
bashar hai aur ġham-e-āb-o-dāna rakhtā hai

milā bhī to vo ġham-e-zindagī ke kaam aayā
mire liye har ik aañsū meñ ek jaam aayā

ġham aur hotā sun ke gar aate na vo 'vasīm'
achchhā hai mere haal kī un ko ḳhabar nahīñ

ujḌī duniyā ko basāyā hai zarā dekho to
ġham kī mahfil ko sajāyā hai zarā dekho to