Tags-Gham

ye rāz-o-niyāz-e-ġham kuchh vo bhī samajhte haiñ
jab choT paḌī dil par palkoñ ko salām aayā

ġham aur ḳhushī donoñ har roz ke mehmāñ haiñ
ye sub.h-ba-sub.h aa.ī vo shām-ba-shām aayā

dete rahe fareb-e-musarrat vo pai-ba-pai
maiñ ġham kī manziloñ se guzartā chalā gayā

tasvīr-e-yās-o-ġham thī ba-zāhir nihāñ magar
har naqsh dil hī dil meñ ubhartā chalā gayā

na raat baaqī hai koī na ḳhvāb baaqī hai
magar abhī mire ġham kā hisāb kā baaqī hai

un ke ruḳh se naqāb aaj uThegī ab nazāroñ kī merāj hogī
ek muddat se aaj ahl-e-ġham ko muskurāne kī mohlat milegī

ġham-e-firāq kī saḳhtī visāl se badle
jo maut aa.e mujhe merī zindagī ho jaa.e

laakh pīchhā chhuḌānā chāhā magar
ġham huā hī judā nahīñ mujh se

kaise tajdīd-e-ahd-e-vafā kījiye ġham maza de rahe haiñ so kyā kījiye
dar pe aa kar vo aksar Thaharte rahe khaTkāte rahe aur ham so ga.e

avval avval to har shab qayāmat huī rafta rafta hameñ aisī aadat huī
ghar ke āñgan meñ ġham raqs karte rahe ġhul machāte rahe aur ham so ga.e

be-tābī-e-ġham-hā-e-darūñ kam nahīñ hogī
ye aag to ab tum se bhī maddham nahīñ hogī

ham sab ko sunā kar hī raheñge ġham-e-hastī
āvāz kisī shor meñ mudġham nahīñ hogī

maiñ to bahr-e-ġham ke tūfānoñ se Takrātā rahā
log kuchh sāhil pe baiThe tabsira karte rahe

kishvar meñ dil ke thā amal-e-sūbādār-e-aish
ab ġham kā iḳhtiyār huā kyā bajā huā

ġham āfrīñ thā musalsal sukūt-e-shahar-e-habīb
ham is galī se magar phir bhī shādmāñ guzre

un ko bhī koī rañj hai mujh ko bhī koī ġham
ik fikr sī din raat idhar bhī hai udhar bhī

'aḳhgar' hī kā dāman nahīñ namnāk shab-e-ġham
āñkhoñ kī ye barsāt idhar bhī hai udhar bhī

ye vo kāfir hai ishq-e-ḳhāna-ḳharāb
tum mire ġham-kade meñ aane lage

karam kiyā hai ġham-e-ishq ne mire dil meñ
maiñ kis tarah na karūñ pās-e-mehmāñ nāseh

koī ġham-ḳhvār na monis hai zamāne bhar meñ
ek muddat se musībat meñ giraftār haiñ ham