Tags-Gham

apnī pahchān ke sab rañg miTā do na kahīñ
ḳhud ko itnā ġham-e-jānāñ se shanāsā na karo

ye tere hijr kā ġham thā vo tere ishq kā daaġh
gayā jo khā ke mujhe jo miTā miTā ke mujhe

bārisheñ chhat pe khulī jag.hoñ pe hotī haiñ magar
ġham vo sāvan hai jo un kamroñ ke andar barse

jalā.ūñ sham.a to āḳhir jalā ke dekhūñ kyā
har ek raat yahāñ shaġhl-e-ġham-parastī hai

duniyā se kar ke pyaar lagā.eñge qahqahe
ġham par hazār baar lagā.eñge qahqahe

kuchh ġham nahīñ hai ham ko zamāne kā dosto
patjhaḌ ho yā bahār lagā.eñge qahqahe

zi-bas ki ātish-e-ġham shola-zan hai siine meñ
girīñ haiñ ashk kī jāgah sharār āñkhoñ se

Tuk aa ke dekh tū ai sarv-qad mirā ahvāl
ravāñ hai ġham meñ tire jūebār āñkhoñ se

shab-e-ġham jo aa.ī 'sālik' miTe bātnī andhere
mirā dil huā munavvar tab-o-tāb-e-jāvedāñ se

koī aa ke hameñ DhūñDegā to kho jā.egā
ham na.e ġham meñ purāne se bahut aage haiñ

tire pyaar meñ zaḳhm khā khā ke ik din
ki āġhosh-e-ġham meñ utar jā.ūñgā maiñ

dil kī kyā pūchhe hai ik qatra-e-ḳhūñ thā hamdam
so ġham-e-ishq ne aate hī use nosh kiyā

dil-e-betāb ko mushkil se sambhālā thā magar
zabt-e-ġham ne mujhe āmāda-e-fariyād kiyā

mile ġhairoñ se mujh ko ranj o ġham yuuñ bhī hai aur yuuñ bhī
vafā-dushman jafā-jū kā sitam yuuñ bhī hai aur yuuñ bhī

ranj-o-malāl-o-ġham se kisī ko mafar nahīñ
āzād qaid-e-fikr se koī bashar nahīñ

ahl-e-duniyā se ye kahte haiñ mire nāla-e-dil
ham sadā deñge ġham-e-hijr ke mīnāroñ se

ishq hamdardī-e-ālam kā ravādār nahīñ
ho ga.ī bhuul 'firāq' aap ke ġham-ḳhvāroñ se

shaam aa.ī tirī yādoñ ke sitāre nikle
rañg hī ġham ke nahīñ naqsh bhī pyāre nikle

bhuul hī nahīñ sakte ai ġham-e-jahāñ tū ne
jis tarah pazīrā.ī umr bhar hamārī kī

jab bichhaḌ jaatā hai koī apnā
ġham hī bas rozgār hotā hai