Tags-Gham

huā jo sar-e-shām dil paash paash
kiyā tār-e-ġham se rafū raat bhar

tabī.at in dinoñ begāna-e-ġham hotī jaatī hai
mire hisse kī goyā har ḳhushī kam hotī jaatī hai

ubharne ke nahīñ bahr-e-fanā meñ Dūbne vaale
dur-e-maqsūd hī ġham hai to phir kyā kaam sāhil se

baḌh jaa.e ġham kā silsila kohsār kī tarah
tūlānī gar ye zindagi-e-musta.ār ho

yaksāñ hai ahl-e-dil ke liye imbisāt-o-ġham
bāġh-e-jahāñ meñ aa.e ḳhizāñ yā bahār ho

hama-tan kabhī hue dard-o-ġham hama-tan kabhī hue sabr ham
kabhī aap apnā maraz hue kabhī aap apnī davā hue

mohabbat kī sazā paa.ī bahut hai
hamāre ġham meñ gīrā.ī bahut hai

āsūda-e-ġham-hā-e-ḳhizāñ ho ga.e āḳhir
phūloñ ne kahāñ pūchhā hameñ ḳhaar se pahle

jhūTī tasalliyoñ pe shab-e-ġham basar huī
uThī chamak jo zaḳhm meñ samjhā sahar huī

'jāved' bū-e-gul ko havā aa ke le ga.ī
kaliyoñ ko ġham huā na guloñ ko ḳhabar huī

supurd-e-ġham-zadagān-e-saf-e-vafā huā maiñ
paḌā huuñ umr kī dīvār se girā huā maiñ

ḳhush-nasībī hai ki maiñ ashraf-e-maḳhlūq huā
lillāhil-hamd ġham-e-ishq kī lazzat dekhī

magar ye ki in rozoñ phir 'mus.hafī' ko
tire ġham meñ saudā huā chāhtā hai

jahāñ jahāñ bhī ga.ī ġham ke ās-pās rahī
kisī maqām pe dekhī nahīñ ḳhushī tanhā

ġham apnī jāgīr 'hanīf'
ishq parāyā maḳhmal likh

tasvīr ho terī jab dil meñ ġham dil ke qarīb aa.e kaise
maiñ yaad tujhe kar letā huuñ jab koī bhī uljhan huī hai

chhaTā to kyā hai tere ġham kā bādal
baras kar aur gahrā ho gayā hai

ġhazal kah kar ġham-e-jānāñ se 'anjum'
ta.alluq aur gahrā ho gayā hai

hai vahī jabr-e-asīrī aur vahī ġham kā qafas
dil pe ban aa.ī to kyā ye ruuh ghabrā.ī to kyā

kisī kī yaad kī mash.al jalā jalā ke 'asar'
añdherā ġham kā miTāo ki ham ġhazal kah leñ