Tags-Gham

maiñ jab bhī ġhaur kartā huuñ tirī is bevafā.ī par
to ġham kī aag meñ mehr-o-vafā ke phuul jalte haiñ

zindagī kitnī masarrat se guzartī yā rab
aish kī tarah agar ġham bhī gavārā hotā

ġham-e-ulfat jo na miltā ġham-e-hastī miltā
kisī sūrat to zamāne meñ guzārā hotā

hadīs-e-ġham sunāne se pareshānī nahīñ jaatī
magar kuchh log haiñ jin kī ye nādānī nahīñ jaatī

asbāb-e-ġham-e-ishq baham karte raheñge
vīrāni-e-daurāñ pe karam karte raheñge

ḳhud hī ab raushan kareñge apne ġham-ḳhāne ko ham
dekh lī taaro tumhārī sa.i-e-lā-hāsil kī baat

jalte rahe charāġh kī sūrat tamām umr
lekin fazā-e-ġham ko farozāñ kiye hue

ġham-gusāro bahut udaas huuñ maiñ
aaj bahlā sako to aa jaao

maiñ apnī baat daraḳhtoñ se kah ke rotā huuñ
ki mere ġham ko kisī rut na āshiyāna milā

bulbul hī ko bahār ke jaane kā ġham nahīñ
har barg haath maltā hai gulzār ke liye

soch kar ġham dījiye aisā na ho
aap ko karnī paḌeñ ġham-ḳhvāriyāñ

hameñ duniyā meñ apne ġham se matlab
zamāne kī ḳhushī se vāstā kyā

guloñ kā khul ke bikharnā hai aa.ina ġham kā
chaman kā yuuñ to har ik patta naqsh-e-ibrat hai

ab ai ġham-e-zamāna tirā kyā ḳhayāl hai
ham apne saath le ke ġham-e-ishq aa.e haiñ

yuuñ bhī milī hai mujh ko mire zabt-e-ġham kī daad
aksar vo sar jhukā.e hue muskurā.e haiñ

na terī yaad na duniyā kā ġham na apnā ḳhayāl
ajiib sūrat-e-hālāt ho ga.ī pyāre

ġham-o-ḳhushī ke agar silsile nahīñ chalte
to mere saath kabhī hausle nahīñ chalte

kabhī kabhī arz-e-ġham kī ḳhātir ham ik bahānā bhī chāhte haiñ
jab āñsuoñ se bharī hoñ āñkheñ to muskurānā bhī chāhte haiñ

kaise mileñ ham tum se yaaro kaise bulā.eñ ghar apne
ġham hī ġham haiñ paas hamāre koī ḳhushī kī baat nahīñ

kabhī shab Dhale koī shakl merī ḳhabar ko de
ġham-e-be-jahat ko maqām kar kaf-e-kūza-gar