Tags-Gham

ḳhushī ko ham-nashīñ apnā banā kar
nishān-e-ġham bahut gahrā huā hai

jab ye tai hai ki ġham-e-ishq bahut kaafī hai
ġham kā mafhūm hī samjhāo ki kuchh raat kaTe

zabt-e-ġham mushkil hai aur mushkil hai mushkil kā javāb
nāseh-e-mushfiq tire bas kā nahīñ dil kā javāb

ye kyā kam hai ki mere dil meñ pinhāñ daulat-e-ġham hai
maiñ akasr apnī palkoñ ko sitāroñ se sajātā huuñ

hai garāñ-sair ġham-e-rāhila-o-zād se tū
koh o dariyā se guzar sakte haiñ mānind-e-nasīm

ġham kī vaadī hai na yādoñ kā sulagtā jañgal
haa.e aise meñ kahāñ chhoḌ gayā hai koī

ab ġham kī raat sair-e-charāġhāñ hai ai 'sirāj'
ye ashk garm tel hai āñkheñ sakoriyāñ

hamārī diid ko raqs-e-sharār chhoḌ gayā
judā.iyoñ kī shab-e-ġham guzārne vaalā

milegī haañ rañg meñ ḳhizāñ ke bahār Duubī huī milegī
talāsh kar ḳhār-zār-e-ġham meñ koī to kopal harī milegī

ye zard chehra ye dard-e-paiham koī sunegā to kyā kahegā
zarā se dil meñ hazār-hā ġham koī sunegā to kyā kahegā

bichhaḌne vāloñ kā ġham na kiije ḳhud apne uupar sitam na kījiye
udaas chehra hai aañkh pur-nam koī sunegā to kyā kahegā

balā.eñ kitnī bhī aa.eñ sar par 'ra.īs' ġham kī na kiije shohrat
ye āh-o-zārī ye shor-e-mātam koī sunegā to kyā kahegā

'qatīl' kaise kaTegī ye dopahar ġham kī
mire nasīb meñ un gesuoñ kā saayā nahīñ

jāñ-bar bhī ho ga.e haiñ bahut mujh se nīm-jāñ
kyā ġham hai ai tabīb jo puurī vahāñ kī hai

sun kar mirā fasāna-e-ġham us ne ye kahā
ho jaa.e jhuuT sach yahī ḳhūbī bayāñ kī hai

phuul hī phuul damakte haiñ karāñ-tā-ba-karāñ
sho.ala-zār-e-ġham-e-hastī se guzar kar dekho

shām-e-ġham ke sulagte sahrā meñ
ik umañDtī huī ghaTā thā firāq

dāvat-e-shoḳhī-e-taqdīr use kahte haiñ
kār-e-imroz na karnā ġham-e-fardā karnā

tarjumān-e-ġham-e-dil un kī nazar hotī hai
jin ko aatā nahīñ iz.hār-e-tamannā karnā

koshish-e-zabt meñ har saañs qayāmat hai 'urūj'
khel samjhe ho ġham-e-dil ko gavārā karnā