Tags-Gham

un kī ḳhushiyoñ pe hī mauqūf nahīñ apnī ḳhushī
un kā baḳhshā huā har ġham bhī mazā detā hai

ġham ke sahrā meñ bikhar jā.ūñ maiñ tinkoñ kī tarah
ek jhoñkā bhī ye tūfān uThā jā.egā

thī dast-gāh bayāñ par magar kamāl-e-hunar
ġham-e-hayāt ke qissoñ ko Tālne meñ gayā

kyuuñ yūrish-e-tarab meñ bhī ġham yaad aa ga.e
sochā tire karam ko sitam yaad aa ga.e

raheñge saath phir bhī ham mohabbat mar ga.ī kyā ġham
ki masnūī tanaffus par guzārā ho bhī saktā hai

tū aur ġham-e-ulfat 'jazbī' mujh ko to yaqīñ aa.e na kabhī
jis qalb pe TuuTe hoñ patthar us qalb meñ nashtar TuuT ga.e

koī hijratī ġham-e-dahr meñ ho ravāñ-davāñ kisī lahar meñ
koī rah rahā thā jahāñ vahāñ vo rahā na ho kahīñ yuuñ na ho

raunaq-e-dil baḌhā.e rakhte haiñ
ġham ko mehmāñ banā.e rakhte haiñ

maktūb-e-ġham hamārā paḌhā hī nahīñ gayā
varna to us meñ haal thā saarā likhā gayā

ḳhāmosh qahqahoñ meñ bhī ġham dekhte rahe
duniyā na dekh paa.ī jo ham dekhte rahe

bahut the aish ke lamhoñ meñ jāñ-nisār apne
paḌā jo vaqt koī ġham-gusār bhī na milā

ziist se paa.e haiñ ġham itne ki ab to ham ko
apnī ḳhushiyoñ ke bhī gulzār se Dar lagtā hai

is dard-o-sitam kā nahīñ ġham mujh ko sanam tū
hai aas ho ye ḳhatm safar shaam se pahle

iflās se baḌh kar nahīñ hotā koī bhī dukh
is ġham meñ gire TuuT ki dar shaam se pahle

bhaTke huoñ kī rāheñ to aksar haiñ huī ġham
kab milte unheñ apne hī ghar shaam se pahle

mausam-e-ġham guzar na jaa.e kahīñ
shab meñ sūraj nikal na aa.e kahīñ

mujhe to ishq meñ ab aish-o-ġham barābar hai
ba-rañg-e-sāya vajūd-o-adam barābar hai

na kuchh hai aish se bālīdgī na ġham se gudāz
hamāre kaam meñ sab nosh o sam barābar hai

ḳhayāl-e-nāvak-e-mizhgāñ meñ bas ham sar paTakte haiñ
hamāre dil meñ muddat se ye ḳhār-e-ġham khaTakte haiñ