Tags-Gham

ummīd-o-yās-o-hasrat-o-armān-o-ārzū
kyā kyā na rāh-e-ġham meñ mujhe ham-safar mile

nāseh ihānat-e-ġham-e-jānāñ nahīñ qubūl
luuñ jaan de ke mujh ko mohabbat agar mile

ġham o ālām haiñ yā hasrateñ haiñ zindagī meñ
tumhāre baad baaqī kyā bachā hai intihā hai

ye TuuTī kashtiyāñ aur bahr-e-ġham ke tez dhāre haiñ
kināroñ se haiñ ummīdeñ na maujoñ ke sahāre haiñ

kuchh hashr-ḳhezī shab-e-ġham-e-intizār-e-marg
kuchh duur zulm vaqt kī tāḳhīr kar chuke

karam karegā mire haal par magar pahle
sharāratan vo mujhe ġham-shanās kar degā

ġham is qadar nahīñ the Dhale jitne sher meñ
daulat banā.ī ḳhuub matā-e-qalīl se

ghar meñ kyā ġham ke sivā thā jo bahā le jaatā
merī vīrānī pe hañstā rahā dariyā us kā

ġham-e-zindagī tirī raah meñ shab-e-ārzū tirī chaah meñ
jo ujaḌ gayā vo basā nahīñ jo bichhaḌ gayā vo milā nahīñ

log gūñge haiñ bayābāñ meñ azaañ kaise ho
log qātil haiñ ilāj-e-ġham-e-jāñ kaise ho

ai vā-e-talḳh-kāmī-e-roz-e-bad-firāq
nāseh ne jān-e-ġham-zada khaa.ī tamām shab

mish.aleñ le ke tumhāre ġham kī
ham añdheroñ meñ chalā karte the

paḌhtī rahtī huuñ maiñ pahroñ ant kuchh maatā nahīñ
dard-o-ġham kī dāstāñ bhī ḳhatm hotī hai kahīñ

kyuuñ paḌā dam toḌtā hai bistar-e-ġham par dilā
aah kis be-dard ke milne meñ toḌā paḌ gayā

aa ki tere baġhair kaif nahīñ
merī ġham āfrīñ bahār meñ aa

mirā haal pūchh ke ham-nashīñ mire soz-e-dil ko havā na de
bas yahī duā maiñ karūñ huuñ ab ki ye ġham kisī ko ḳhudā na de

ye jo zaḳhm-e-dil ko pakā.e ham liye phir rahe haiñ chhupā.e ham
koī nā-shanās-e-mizāj-e-ġham kahīñ haath us ko lagā na de

tab-o-tāb-e-ishq kā hai karam ki jamī hai mahfil-e-chashm-e-nam
zarā dekhiyo ai havā-e-ġham ye charāġh koī bujhā na de

har ḳhushī dil se kyuuñ lagā baiTheñ
kis meñ ġham ho pata nahīñ hotā

dil meñ rakkhā thā sharār-e-ġham ko aañsū jaan ke
haañ magar dekhe ajab andāz is tūfān ke