Tags-Ghamand

thī un ke rū-ba-rū bhī vahī shān-e-iztirāb
dil ko bhī apnī vaz.a pe kitnā ġhurūr thā

itnā na kījiye gul-e-ruḳhsār par ġhurūr
do din kī ye bahār hai aaj aa.ī kal ga.ī

us ke hasīñ libās pe ik daaġh kyā lagā
saarā ġhurūr ḳhaak meñ us kā milā diyā

pesh-ḳhema haiñ tanazzul kā takabbur aur ġhurūr
martaba chāho to pahle inkisārī siikh lo

sar-e-niyāz bhī apnā kabhī na ḳham hogā
jhalak ġhurūr kī hai aap kī adāoñ meñ

ġhurūr-e-lutf-e-sāqī nashsha-e-be-bākī-e-mastāñ
nam-e-dāmān-e-isyāñ hai tarāvat mauj-e-kausar kī

saarā ġhurūr-e-āshiqī ḳhaak meñ mil ke rah gayā
ho gayā un kā sāmnā tark-e-talab ke ba.ad bhī

ġhurūr-e-husn kī be-iltifātiyoñ kī tarah
nigāh-e-shauq rahī ab na iltijā.eñ rahīñ

vo jo ham-rahī kā ġhurūr thā vo savād-e-rāh meñ jal-bujhā
tū havā ke ishq meñ ghul gayā maiñ zamīñ kī chaah meñ jal-bujhā

mere andar kā ġhurūr andar guzartā rah gayā
sar se paañv tak utarnā thā utartā rah gayā

tujh ko biThā ke duur se dekhā kareñge ham
yuuñ bhī tire ġhurūr se khelā kareñge ham

bahut aziiz hameñ terī dostī hai magar
agar ġhurūr hai tujh meñ anā hamārī bhī hai

vaañ vo ġhurūr-e-izz-o-nāz yaañ ye hijāb-e-pās-e-vaza.a
raah meñ ham mileñ kahāñ bazm meñ vo bulā.e kyuuñ

yaañ ba-īñ aalim ġhurūr-e-yūsufiyat bhī nahīñ
vaañ zuleḳhā.ī ba-azm-e-chāk-dāmānī hai aaj

husn teraa Guruur meraa thaa
sach to ye hai qusuur meraa thaa

aa.ina dekh kar ġhurūr fuzūl
baat vo kar jo dūsrā na kare

ġhurūr-e-sar-bulandī kyā ki ik din
na sar hogā na ye dastār hogī

agar ġhurūr hai sūraj ko apnī hiddat par
to phir ye qatra bhī tūfān hone vaalā hai

mire liye tirī jānib se pyaar kā iz.hār
mire ġhurūr kā sāmān hone vaalā hai

taġhāful ek bharam thā ġhurūr-e-jānāñ kā
mirī nigāh-e-mohabbat kā ramz pā hī ga.ī