Tags-Ghamand

jahāñ se ilm kā ham ko ġhurūr hotā hai
vahīñ se hotī hai bas ibtidā jahālat kī

ġhurūr vīrāniyoñ pe apnī abas bayābāñ ko is qadar hai
rivāj paayā hai ye tarīqa haqīqatan mere ghar se pahle

palaT ke dekh na us ko vo ḳhaak kar degā
tire ġhurūr ko zahrāb kī anī ban kar

bilā-sabab na thā us meñ vafūr-e-ḳhud-bīnī
ġhurūr-e-husn ke ham-rāh thī nazākat bhī

shām-e-firāq aa.ī to dil Dūbne lagā
ham ko bhī apne aap pe kitnā ġhurūr thā

sarmāya-e-hayāt huā chāhtā hai ḳhatm
jis par ġhurūr thā vahī daulat nahīñ rahī

na ġhurūr hai ḳhirad ko na junūñ meñ bāñkpan hai
ye mizāj-e-zindagī to baḌā hausla-shikan hai

us adā se bhī huuñ maiñ āshnā tujhe itnā jis pe ġhurūr hai
maiñ jiyūñgā tere baġhair bhī mujhe zindagī kā shu.ūr hai

jo mujhe bhulā deñge maiñ unheñ bhulā dūñgā
sab ġhurūr un kā maiñ ḳhaak meñ milā dūñgā

buġhz-o-kīna hasad ġhurūr-o-nifāq
aadmī ko la.iiñ banāte haiñ

ġhurūr-e-husn kā sadqa koī jaatā hai duniyā se
kisī kī ḳhaak meñ miltī javānī dekhte jaao

ġhurūr-e-jādā-shanāsī bajā sahī lekin
surāġh-e-manzil-e-maqsūd bhī koī paa.e

āsiyoñ ko rahmat-e-haq par ġhurūr
zāhidoñ ko jab.ha-sā.ī par ghamanD

adū ne ham se hamārā ġhurūr māñgā thā
anā-parast the ham zindagī ko bhuul ga.e

chīñ-bar-jabīñ na ai but-e-chīñ rah ġhurūr se
tasvīr kā hai aib jo chehra bigaḌ gayā

ġhurūr le ke marā iḳhtiyār-e-hastī kā
tū apnī fikr-e-hayāt-o-mamāt le ke gayā

mirā ġhurūr hai ye ḳhāk-zādgī merī
maiñ phir farishto tumheñ baat ye batā rahā huuñ

ġhurūr-e-husn kī ḳhuddāriyāñ ḳhud aa na sakā
shuā-e-husn ko markaz pe lā ke dekh liyā

use ġhurūr atā hai koī to ab aa.e
jo us ke dast meñ bhī kāsa-e-gadā.ī de