Tags-Ghamand

tire ġhurūr ke hai rū-ba-rū ye ḳhush-shikanī
jhukā ke sar na hue pesh shahryār ke bhī

ā.īna dekh apnā sā muñh le ke rah ga.e
sāhab ko dil na dene pe kitnā ġhurūr thā

jis sar ko ġhurūr aaj hai yaañ tāj-varī kā
kal us pe yahīñ shor hai phir nauhagarī kā

ġhurūr saath meñ chaltā hai har ghaḌī us ke
vo ab amiir hai tanhā safar nahīñ kartā

sar ko na pheñk apne falak par ġhurūr se
tū ḳhaak se banā hai tirā ghar zamīn hai

ġhurūr tund havāoñ kā yuuñ bhī toḌā hai
charāġh haath pe rakh kar guzar ga.e haiñ log

mujhe ġhurūr hai maiñ dostoñ kī nekī huuñ
unheñ ḳhushī hai ki dariyā meñ Daal aa.e the

ġhurūr-o-tamkanat-o-jahl se nibhā lenā
farāz-e-koh ko goyā ġhubār karnā hai

ġhurūr-e-husn na kar jazba-e-zuleḳhā dekh
kiyā hai ishq ne yūsuf ġhulām āshiq kā

ġhurūr-e-husn se hargiz sunegā ek na gul
chaman meñ naale agar bulbuleñ hazār kareñ

aariz pe tere merī mohabbat kī surḳhiyāñ
merī jabīñ pe terī vafā kā ġhurūr hai

chaar din kī zindagī par musht-e-ḳhāk itnā ġhurūr
piis degā ek din ye āsmān-e-pīr dekh

allāh allāh re un butoñ kā ġhurūr
ye ḳhudā.ī nahīñ to phir kyā hai

ajab ġhurūr meñ aa kar baras paḌā bādal
ki phailtā huā chāroñ taraf ġhubār jo thā

koī batā.e ye us ke ġhurūr-e-bejā ko
vo jañg maiñ ne laḌī hī nahīñ jo haarī hai

na ḳhirad rahī na junūñ bachā dil-e-pur-ġhurūr ye kyā huā
tujhe apne aap pe ḳhud bhī ab zarā e'tibār nahīñ hai

ġhurūr itnā na kar tīr-e-sitam par
ki aksar chuuk jaatā hai nishāna

mujhe bhī faqr kī daulat pe faḳhr thā yaaro
use bhī la.al-o-guhar kā ġhurūr hāsil thā

ḳhulūs aur āshtī kī raah meñ āñkheñ bichhātā huuñ
ġhurūr-e-jāh ke aage mirā sar ḳham nahīñ hotā