Tags-Ghar

raah meñ ghar ke ishāre bhī nahīñ nikleñge
chāñd Duubā to sitāre bhī nahīñ nikleñge

kuchh shahr ke dukhḌe haiñ kuchh ghar ke masā.il haiñ
mujh ko ye tirā ḳhat bhī aḳhbār sā lagtā hai

bhāgte sūraj ko pīchhe chhoḌ kar jā.eñge ham
shaam ke hote hī vāpas apne ghar jā.eñge ham

us ghar kī badaulat mire sheroñ ko hai shohrat
vo ghar ki jo is shahr meñ badnām bahut hai

ujālā karte tumhāre ghar meñ jo bas meñ hotā 'ġhazal' hamāre
duā hamārī hai umr saarī ḳhudī ko tum bā-kamāl rakhnā

añdhere ghar kī kuchh parvā nahīñ hai tīra-baḳhtoñ ko
tum aao qabr par raushan charāġh-e-naqsh-e-pā hogā

kyā guzartī hai mire dil par ḳhudārā kuchh na pūchh
dushmanoñ ko jab talak ghar kā patā detā huuñ maiñ

jaale tane hue haiñ ghar meñ koī nahīñ
''koī nahīñ'' ik ik konā chillātā hai

darīche maiñ ne muqaffal to kar liye lekin
vo ḳhushbuoñ kī tarah ghar meñ aatā jaatā hai

ġhurūr vīrāniyoñ pe apnī abas bayābāñ ko is qadar hai
rivāj paayā hai ye tarīqa haqīqatan mere ghar se pahle

lauT aatī thiiñ ka.ī sābiq patoñ kī chiTThiyāñ
ghar badal dete the bāshinde magar aisā bhī thā

har na.ī rut meñ badal jaatī thī taḳhtī naam kī
jis ko ham apnā samajhte koī ghar aisā bhī thā

har ik insān ke a.amāl bhī yaksāñ nahīñ hote
koī ghar toḌ detā hai koī ta.amīr kartā hai

tujh ghar kī taraf sundar aatā hai 'valī' daa.em
mushtāq daras kā hai Tuk dars dikhātī jā

tanhā.iyoñ kā dard bhulāne ke vāste
ḳhud apne ghar meñ shor machānā paḌā hameñ

aadmī ghir gayā masā.il meñ
rah ga.ī ziist be-sukūñ tanhā

vo makīn-e-dil huā ḳhurshīd-'akbar'
ghar kā darvāza khulā hone se pahle

khiḌkiyoñ kī oT se andāza ho saktā nahīñ
shahr kā ahvāl tum ghar se nikal kar dekhte

chhoḌ bhī aa.e vo ghar bhuul bhī aa.e haiñ vo yaad
dil meñ kuchh TuuTe hue tiir ke mānand bhī hai

lahū meñ Duub ke talvār mere ghar pahuñchī
vo sar-buland huuñ dastār mere ghar pahuñchī