Tags-Ghar

us se bas ik baar milā par hairāñ huuñ
dil meñ tab se ghar kar ke vo baiThā hai

sūraj ko kyā pata hai kidhar dhuup chāhiye
āñgan baḌā hai apne bhī ghar dhuup chāhiye

khiḌkiyoñ se jhāñktī hai raushnī
battiyāñ jaltī haiñ ghar ghar raat meñ

har ik se pūchhte phirte haiñ tere ḳhāna-ba-dosh
azāb-e-dar-ba-darī kis ke ghar meñ rakkhā jaa.e

ab kise dil ke dhaḌakne kī sadā.eñ yaad haiñ
ye bhī hañgāma gayā is ghar kī vīrānī ke saath

sahrā se bhī vīrāñ mirā ghar hai ki nahīñ hai
is tarah se jiinā bhī hunar hai ki nahīñ hai

bhaTke hue aalī se pūchho ghar vāpas kab aa.egā
kab ye dar-o-dīvār sajeñge kab ye chaman lahrā.egā

suukh chale vo ġhunche jin se kyā kyā phuul ubharne the
ab bhī na un kī pyaas bujhī to ghar jañgal ho jā.egā

faiz thā us ke tasavvur kā jo chashm-e-tar tak
qāfile rañg ke khiñch aa.e hamāre ghar tak

'shād' itnī baḌh ga.ī haiñ mere dil kī vahshateñ
ab junūñ meñ dasht aur ghar ek jaise ho ga.e

kis qadar thā garm naala bulbul-e-nāshād kā
aag phūloñ meñ lagī ghar jal gayā sayyād kā

jaane kab shahr ke rishtoñ kā badal jaa.e mizāj
itnā āsāñ to nahīñ lauT ke ghar aanā bhī

koī to hamdam-e-derīna de sadā is dam
vo ajnabī hoñ ki mānūs apnā ghar bhī nahīñ

ghar aur ghar ke ḳhvāb se hijrat ke ba.ad bhī
kyuuñ bām-o-dar ke dhoke meñ rakkhā gayā mujhe

raste hī meñ ho jaatī haiñ bāteñ bas do-chār
ab to un ke ghar bhī jaanā kam kam hotā hai

maiñ tamām hosh kho kar tire dar pe jaañ se jaatā
tire ghar ke rāstoñ meñ kahīñ mai-kada nahīñ thā

zabāñ ma.atūb tahzīb-o-saqāfat daar kī zad meñ
ghar āñgan izzat-o-nāmūs kul talvār kī zad meñ

na mujh pe tanz karo dosto ki be-ghar huuñ
tumhīñ kaho ki hai tum meñ se apnā ghar kis kā

hamāre ghar kā ajīb-o-ġharīb manzar hai
kahīñ to aag lagī hai kahīñ samundar hai

junūn-e-dasht-pasandī batā.e detā hai
guzārnī thī jo ghar meñ vo ham guzār aa.e