Tags-Ghar

ilāhī ḳhair ki tūfān-e-bād-o-bārāñ meñ
hameñ bachānā hai ḳhud ko bhī ghar meñ rakhnā hai

haiñ ghar kī muhāfiz mirī dahkī huī āñkheñ
maiñ taaq meñ rakh aayā huuñ jaltī huī āñkheñ

barakat hamāre rizq meñ aa.egī kis tarah
ghar meñ hamāre jab koī mehmān hī nahīñ

is ghar ke makīnoñ kā ravayya bhī to dekhūñ
taz.īn-e-dar-o-bām meñ khoyā huā kyuuñ huuñ

mere raste meñ jo raunaq thī mere fan kī thī
mere ghar meñ jo añdherā thā mirā apnā thā

vā.izoñ kī maiñ karūñ kyā tārīf
ghar meñ mai-ḳhvār haiñ bāhar vaa.iz

kuchh roz 'nasīr' aao chalo ghar meñ rahā jaa.e
logoñ ko ye shikva hai ki ghar par nahīñ miltā

zamīñ kī sej par saa.e kī chādar oḌh kar soyā
kisī banjāre sailānī ne raste meñ hī ghar dekhā

kisī ke hosh ko kah do agar chalā chāhe
to apne ghar se kamar bāñdh kar abhī nikle

bas ga.ī hai rag rag meñ bām-o-dar kī ḳhāmoshī
chīrtī sī jaatī hai mujh ko ghar kī ḳhāmoshī

chal rahī thī jab mere ghar ke jalne kī taftīsh
dekhne ke qābil thī shahr bhar kī ḳhāmoshī

bharā ghar hai koī sahrā nahīñ hai
yahāñ lekin koī apnā nahīñ hai

phailā hai jab se ghar meñ samundar sukūt kā
be-chārgī kī chhat pe khaḌā chīḳhtā huuñ maiñ

ban ga.e sahrā meñ ghar lekin gharoñ meñ aaj tak
rau vahī vahshat kī hai mausam vahī sahrā kā hai

aalam meñ hai ghar ghar ḳhushī-o-aish par us bin
mātam-kada ham ko nazar aatā hai ghar apnā

jī lagā rakkhā hai yuuñ ta.abīr ke auhām se
zindagī kyā hai miyāñ bas ek ghar ḳhvāboñ kā hai

sajde ke har nishāñ pe hai ḳhuuñ sā jamā huā
yaaro ye us ke ghar kā kahīñ rāsta na ho

dekh to leñ dil meñ tere ghar bhī kar sakte haiñ ham
dil to ham deñge tujhe lekin tirā dil dekh kar

kis ko ḳhush aatī hamārī chhat kī sāya-afganī
ghar banāyā thā to phir be-ḳhānamāñ honā hī thā

us galī se chalī dard kī rau magar shahr meñ ahl-e-dil haiñ na ahl-e-nazar
jaane kis sar se guzregī ye mauj-e-ḳhūñ jaane kis ghar ye sailāb-e-ġham jā.egā