Tags-Ghar

jal jā.iye maqām pe apne misāl-e-sham.a
apne badan kī lau se na ghar ko jalā.iye

ābād kījiye isī ghar meñ junūñ ko aap
is ghar meñ kyā nahīñ hai jo sahrā ko jā.iye

ek din tere ghar meñ aanā hai
baḳht o taal.e ne gar rasā.ī kī

ek parinda uḌne kī koshish meñ gir gir jaatā thā
ghar jaanā thā us ko par vo raat bahut hī kaalī thī

āñgan meñ jo diip qatāroñ meñ rakkhe the dhuāñ hue
havā chalī us raat bahut jab mere ghar dīvālī thī

ik muddat par ghar lauTā thā paas jab us ke baiThā maiñ
mujh meñ bhī maujūd nahīñ thī vo ḳhud meñ bhī ḳhālī thī

tujh se ābād ho is dil kā nagar aa bhī jā
ye makāñ tere binā ghar nahīñ hotā yaksar

banāo ghar na miTTī ke lab-e-sāhil ai nādānoñ
samundar to kināroñ se vafādārī nahīñ rakhte

dar-o-dīvār se un ke bhalā kyā aa.egī ḳhushbū
jo ghar ke sahn meñ phūloñ kī ik kyārī nahīñ rakhte

na to ro.e ġhair na ghar rahe na shab-e-firāq meñ mar rahe
na vafā kare na sitam sahe na jafā huī na huā qalaq

sāhil se biich samundar gahrā paanī
ghar miTTī ghar se bāhar gahrā paanī

mere chehre par munaqqash is tarah tārīḳh hai
jaise ik kohna ajā.ib ghar kā bāshinda huuñ maiñ

ghar kī dīvār thī hī bosīda
ab kī bārish meñ gir ga.ī hogī

'sālik' mile jo bazm meñ us kī to lutf hai
varna piyā hī karte haiñ ham apne ghar sharāb

ab dhuup muqaddar huī chhappar na milegā
ham ḳhāna-ba-doshoñ ko kahīñ ghar na milegā

us baaġh meñ khilte haiñ abhī jhulse hue phuul
us baaġh meñ ḳhushbū ko abhī ghar na milegā

nekiyāñ miltī haiñ nisbat se buzurgoñ kī miyāñ
ye bhī tablīġh hai is baat ko ghar ghar kahnā

zindagī bhar sirf use puujā magar ghar baiTh kar
pāsdārān-e-vafā kā kaam darbānī nahīñ

kitnī zahmat jheltā hai ek muflis mezbān
ghar kī bad-halī ko mehmāñ se chhupāne ke liye

bhuuk un ko le ga.ī hai kār-ḳhānoñ kī taraf
ghar se bachche nikle the schōl jaane ke liye