Tags-Ghar

tamām ruup liye chāñdnī chalī aa.ī
hamārā dil rahā tārīk ek ghar phir bhī

dekho tum apne kachche dar-o-dīvār ko pakkā mat karvānā
shahr meñ jab bhī ā.eñge ham to tumhāre ghar hī qayām kareñge

kis kī aamad hai jo kab se
chāñdnī ghar dho rahī hai

āñdhiyāñ roz mujh se pūchhtī haiñ
ghar meñ kis din diyā jalāo.ge

ḳhvāhishoñ ke hisār meñ ghir kar
rāsta ghar kā bhuul jāoge

ḳhizāñ kī vo sard raat bhī maiñ ne ghar se bāhar guzār dī thī
ki mere bistar pe laash ban kar mirā hī saaya paḌā huā thā

apne ghar kī khiḌkī se maiñ āsmān ko dekhūñgā
jis par terā naam likhā hai us taare ko DhūñDūñgā

bādal oḌh ke guzrūñgā maiñ tere ghar ke āñgan se
qaus-e-quzah ke sab rañgoñ meñ tujh ko bhīgā dekhūñgā

mire ghar kī dīvār par
ahd-e-rafta ke

raushan hue vīrāne ḳhush ho ga.ī duniyā bhī
kuchh ham bhī sukūñ se haiñ ghar apnā jalāne se

koī saaya bhī na sahme hue ghar se niklā
ham ne TuuTī huī dahlīz ko aksar dekhā

jis kā naqsha hai mire zehn meñ ik muddat se
ghar vo tāmīr se pahle hī khañDar kab hogā

Dartā huuñ dekh kar dil-e-be-ārzū ko maiñ
sunsān ghar ye kyuuñ na ho mehmān to gayā

ye safar apnā kahīñ jānib-e-mahshar hī na ho
ham liye kis kā janāza haiñ ye ghar se nikle

nahīñ himmat ki jis meñ ho zamāne ke muqābil
vo apne ghar kī rahdārī meñ dauḌe jā rahā hai

yahāñ se aage kahīñ phir ye kārvāñ na gayā
ki mere ghar se to bāhar kabhī dhuāñ na gayā

pas-e-fanā mirī qismat khulī vo rote haiñ
ḳhud apne ghar meñ banā kar mazār kī sūrat

duniyā se baat kar ke bad-zāt ho gayā maiñ
ab mere ghar mirī hī zaat aa nahīñ rahī hai

maiñ hāthoñ meñ ḳhanjar le kar soch rahā huuñ
lauTūñgā to merā bhī ghar zaḳhmī hogā

aap ishrat-kada-e-ġhair kī rākhī kar ke
aa.eñ aur aa ke kabhī apnā bhī ghar dekheñ to