Tags-Ghar

mujh ko ye kyā ho jaatā hai ghar kā tasavvur aate hī
jaise ghar suunā suunā lagtā hai kisī ke jaate hī

dil hai alag mizāj ke do bhā.iyoñ kā ghar
lagtā hai sirf mujh ko ye tanhā.iyoñ kā ghar

beTī ga.ī hai ghar se lagā ham ko bas yahī
jaise chalā gayā koī amrā.iyoñ kā ghar

duurī banā lī un se yahī sochne ke baad
ghar un kā thā mire liye rusvā.iyoñ kā ghar

jab se milī hai un se nazar restaurant meñ
dil lag rahā hai pyaar kī shahnā.iyoñ kā ghar

jo dūsroñ ke ghar meñ ujālā na kar sake
maiñ aisī raushnī kā talabgār bhī nahīñ

ḳhāmushī kī chār-dīvārī bhī shāyad gir chukī
aaj jaane kyā huā vo shaḳhs bhī be-ghar lagā

ab bhī hai duurī kā ehsās ki shal haiñ paañv
yuuñ to maiñ shahar meñ huuñ aap kā ghar sāmne hai

ghar aa.e ho faqīroñ ke to aao baiTho lutf karo
kyā hai jaan bin apne kane so in qadmoñ pe nisār hai aaj

takmīl pā rahā hai ye kis ke ghar kā naqsha
dīvāreñ uTh chukī haiñ mehrāb ho ga.ī hai

ghar meñ bechainī ho to agle safar kī sochnā
phir safar nākām ho jaa.e to ghar kī sochnā

ya.anī ghar aur dasht donoñ lāzim-o-malzūm haiñ
qā.eda ye hai idhar rahnā udhar kī sochnā

jaate kyuuñ nahīñ ho
ye ghar merā nahīñ hai

nashsha shīshe meñ añgḌā.ī lene lagā bazm-e-rindāñ meñ sāġhar khanakne lagā
mai-kade pe barasne lagīñ mastiyāñ jab ghaTā ghir ke aa.ī mazā aa gayā

ḳhudā ke ghar meñ kyā hai kaam zāhid bāda-ḳhvāroñ kā
jinheñ miltī nahīñ vo tishna-e-zamzam bhī hote haiñ

ghaTā.eñ aa.eñ to ghar ghar ko Dūbtā pā.ūñ
havā chale to har ik peḌ ko girā dekhūñ

vo roz shaam ko 'alvī' idhar se jaatī hai
to kyā maiñ aaj use apne ghar bulā dekhūñ

rogī huā hai dhuup ko tarsā huā badan
ai māmtā supūt ko ghar se nikāl de

jaan kar apnā hī ghar ab dard rahtā hai yahāñ
dil ko ḳhālī us kī ḳhātir to na thā rakkhā huā

koī bhī ghar nahīñ thā shīshe kā
pattharoñ se bharī galī dekhī