Tags-Ghar

āfiyat DhūñDne nikle the ḳhamoshī meñ 'nadīm'
ghir ga.e apnī hī āvāz kī tuġhyānī meñ

ghar meñ dāḳhil hote hī
ham ḳhud ko āvāzeñ dene lagte haiñ

merī aahoñ ko abas hai nā-rasā.ī kā gila
dil meñ ghar karnā to sīkheñ yād-e-dilbar kī tarah

yād-e-gesū ik balā-e-jāñ-sitāñ hai hijr meñ
kaaTe khātā hai mirā ghar mujh ko azhdar kī tarah

un kī aamad kī ḳhabar sun kar hujūm-e-shauq se
kashmakash hai ḳhāna-e-dil meñ bhare ghar kī tarah

aap kī ġhaflat se saarī ārzūeñ mar ga.iiñ
dil mirā vīrān hai ujḌe hue ghar kī tarah

aap aate rahe giit gaate rahe
ghar ke dīvār-o-dar bhī sañvarte rahe

milā hai taptā sahrā dekhne ko
chale the ghar se dariyā dekhne ko

ik na ik aaseb chupke se abhī dar aa.egā
band kar ghar ke darīche laakh darvāza lagā

yahāñ kī masnadeñ sab ke liye haiñ
ye merā ghar hai qasr-e-kai nahīñ hai

makḌī ke jaale kaalī satreñ aur log
ek hī ghar meñ rahte haiñ

jab mohabbat kā kisī shai pe asar ho jaa.e
ek vīrān makāñ boltā ghar ho jaa.e

yahāñ zamīneñ khisak chukī haiñ har ek ghar ab ujaḌ chukā hai
mirā makāñ hai abhī salāmat mujhe bhī ḳhāna-ḳharāb likhnā

rañg ashkoñ kā badalne bhī nahīñ detā vo
aur mujhe ghar se nikalne bhī nahīñ detā vo

badan hai barf magar jal rahā huuñ lakḌī sā
maiñ apne ghar meñ huuñ yā ġhair ke makān meñ huuñ

aaj bhī phirtā huuñ us kī justujū meñ har taraf
kaun sī bastī meñ āḳhir merā ghar rakkhā gayā

ishq meñ vo ghar hai apnā jis meñ se majnūñ ye ek
nā-ḳhalaf saare qabīle kā hamāre nañg hai

ghar nahīñ daulat nahīñ hurmat nahīñ satvat nahīñ
ham bhī kyā āvāra haiñ gardūn-e-gardāñ kī tarah

use chhat par khaḌe dekhā thā maiñ ne
ki jis ke ghar kā darvāza nahīñ hai

chal diyā naaz zamāne ke uThāne vaalā
saare ghar le gayā ghar chhoḌ ke jaane vaalā