Tags-Ghar

ajiib hote haiñ ādāb-e-ruḳhsat-e-mahfil
ki uTh ke vo bhī chalā jis kā ghar na thā koī

pahchāno to ro dogī tum
ghar meñ huuñ bāhar huuñ ghar se

mire dard kī haqīqat koī mere dil se pūchhe
ye charāġh vo hai jis se mire ghar meñ hai ujālā

vo mere ghar nahīñ aatā maiñ us ke ghar nahīñ jaatā
magar in ehtiyātoñ se ta.alluq mar nahīñ jaatā

tū chāhtā hai ghar tirā mahfūz ho agar
phir sirf apnā ghar na bachā shahr ko bachā

apnī rāhat ke liye kis ko gavārā hai ye rañj
ghar banā kar gardan-e-mehrāb ko ḳham kījiye

vahī āñgan vahī khiḌkī vahī dar yaad aatā hai
akelā jab bhī hotā huuñ mujhe ghar yaad aatā hai

umr bhar rāste ghere rahe us shaḳhs kā ghar
umr bhar ḳhauf ke maare na vo bāhar niklā

aahoñ se mire ghar meñ havā garm rahegī
maiñ jā.ūñgā to bhī mirī jā garm rahegī

mehmāñ-navāz un sā koī dūsrā nahīñ
jī meñ hai un ke ghar kabhī mehmān jā.iye

maiñ huuñ aisā paat havā meñ peḌ se jo TuuTe aur soche
dhartī merī gor hai yā ghar ye niilā ākāsh jo sar par

nahīñ hai aap ko fursat agar tavajjoh kī
to maiñ bhī lauTtā huuñ ghar ko aa gayā diije

miltā nahīñ makāñ jo sharīfoñ ke shahr meñ
uTTho tavā.ifoñ ke gharāne meñ ghar karo

badal dekhūñ charāġh-e-shauq se maiñ bhī charāġh apnā
mere ghar se nikal jaa.e isī sūrat dhuāñ shāyad

us ke dar par hī jo rahtā huuñ maiñ din raat paḌā
mujh se jhunjhlā ke kahe hai tire ghar hai ki nahīñ

ghir ghir ke bādal aate haiñ aur be-barse khul jaate haiñ
ummīdoñ kī jhūTī duniyā meñ sūkhī barsāteñ hotī haiñ

ghar kī vo maḳhdūsh imārat gir ke phir ta.amīr huī
ab āñgan meñ peḌ haiñ jitne saare shāḳh burīda haiñ

maiñ vo dariyā huuñ jo ghar se kabhī niklā hī nahīñ
pyaas le kar merī chaukhaT pe samundar aa.e

vo lahū pī kar baḌe andāz se kahtā hai ye
ġham kā har tūfān us ke ghar ke bāhar aa.egā

kuchh bhī kar paa.e na ham hijr kī hairānī meñ
ghar bhī vīrān kiyā dil kī pareshānī meñ